23 ఏళ్లకే డాక్టర్ అవతారం.. ఫేక్ క్లినిక్ గుట్టురట్టు
హైదరాబాద్లో వైద్య అర్హతలు లేకుండానే క్లినిక్ నిర్వహిస్తూ రోగులకు చికిత్స అందిస్తున్నట్లు ఆరోపణలు ఎదుర్కొంటున్న 23 ఏళ్ల యువకుడిని టాస్క్ఫోర్స్, గోల్కొండ పోలీసులు అరెస్ట్ చేశారు. హిక్మా సెహత్ కేర్ సెంటర్పై నిర్వహించిన దాడిలో మహమ్మద్ అద్నాన్ను అదుపులోకి తీసుకున్న పోలీసులు.. క్లినిక్లో పలు అనుమానాస్పద వైద్య సామగ్రిని స్వాధీనం చేసుకున్నారు.
పోలీసుల వివరాల ప్రకారం.. ఎలాంటి గుర్తింపు పొందిన వైద్య అర్హతలు లేకుండానే అద్నాన్ రోగులకు చికిత్స అందిస్తున్నట్లు ఆరోపణలు ఉన్నాయి. ఛాతీనొప్పి, శ్వాస సంబంధిత సమస్యలు, కిడ్నీ, మూత్ర సంబంధిత సమస్యలకు కూడా చికిత్స చేస్తున్నట్లు పోలీసులు గుర్తించారు. రోగులను ఆకర్షించేందుకు సోషల్ మీడియా ద్వారా క్లినిక్కు ప్రచారం నిర్వహించినట్లు కూడా దర్యాప్తులో వెల్లడైనట్లు పోలీసులు తెలిపారు.
దాడి సమయంలో చేతిరాత కోడ్లతో ఉన్న లేబుల్స్ లేని మందుల బాటిళ్లు, వివిధ రకాల మందుల ప్యాకెట్లు, ప్రిస్క్రిప్షన్ పుస్తకాలు, సోషల్ మీడియా ప్రచారానికి సంబంధించిన సామగ్రిని పోలీసులు స్వాధీనం చేసుకున్నారు. మందులపై సరైన వివరాలు లేకపోవడంపై కూడా అధికారులు దృష్టి సారించారు.
ఈ వ్యవహారంలో అద్నాన్ తల్లి, సోదరుడు కూడా భాగస్వాములుగా ఉన్నట్లు పోలీసులు ఆరోపిస్తున్నారు. అయితే ప్రస్తుతం వారు పరారీలో ఉన్నట్లు తెలిపారు. వారి కోసం పోలీసులు గాలింపు చేపట్టారు. క్లినిక్లో ఎలాంటి వైద్య విధానంలో చికిత్స అందించారు, మందులను ఎక్కడి నుంచి తీసుకువచ్చారు, ఎంతకాలంగా ఈ వ్యవహారం కొనసాగుతోంది అనే అంశాలపై పోలీసులు దర్యాప్తు చేస్తున్నారు.
ఈ ఘటనపై సంబంధిత భారతీయ న్యాయ సంహిత నిబంధనల కింద కేసు నమోదు చేసి దర్యాప్తు కొనసాగిస్తున్నారు. అర్హత లేని వ్యక్తులు వైద్యులుగా చలామణి అవుతూ చికిత్స అందించే ఘటనలు ప్రజల ఆరోగ్య భద్రతకు ముప్పుగా మారే అవకాశం ఉండటంతో అధికారులు ఈ వ్యవహారాన్ని సీరియస్గా తీసుకున్నట్లు తెలుస్తోంది.
