అక్కమహాదేవి జయంతి ఉత్సవం
అక్కమహాదేవి జయంతి ఉత్సవం
శ్రీశైల దేవస్థానం, శ్రీశైలం
తేది: 01.04.2026
శ్రీశైల మల్లికార్జునస్వామి వారి పరమ భక్తులలో ఒకరైన శివశరణి అక్కమహాదేవి వారి జయంత్యోత్సవం బుధవారం (01.04.2026) ఉదయం సంప్రదాయబద్దంగా నిర్వహించబడింది.
ఈ సందర్భంగా ఆలయ ప్రాంగణంలోని అక్కమహాదేవి వారికి పంచామృత అభిషేకం, జలాభిషేకం తదితర విశేషపూజలు జరిపించబడ్డాయి.
ఈ విశేషకార్యక్రమంలో భాగంగా ముందుగా జయంత్యోత్సవ సంకల్పం పఠించబడింది. తరువాత కార్యక్రమం నిర్విఘ్నంగా జరిగేందుకు మహాగణపతిపూజ జరిపించబడింది. అనంతరం స్తోత్రపఠనతో అక్కమహాదేవి వారిని పంచామృతాలతోనూ, ఆలయప్రాంగణంలోని మల్లికాగుండ జలంతోనూ అభిషేకించి షోడశోపచారపూజ చేయడం జరిగింది. చివరగా అక్కమహాదేవి వారికి పుష్పాంజలి సమర్పించబడింది.
కాగా 12వ శతాబ్దంలో కన్నడ ప్రాంతాన శివశరణులుగా ప్రసిద్ది పొందిన మహాభక్తులలో అక్కమహాదేవి ఒకరు. వీరవిరాగిణిగా పేరొందిన అక్కమహాదేవి, శ్రీశైలమల్లికార్జునస్వామివారిని తమ భాగస్వామిగా భావించి తరించింది. శ్రీశైల మల్లికార్జునుడిపై ఎన్నో వచనాలను చెప్పిన అక్కమహాదేవి సంస్కృత,కన్నడ భాషలలో ఎంతో ప్రవీణురాలని చెప్పబడుతోంది. కన్నడ వచన సారస్వతంలో ఈమెను విశిష్ట వచనా రచయిత్రిగా సాహితీవేత్తలు పేర్కొంటారు.
ఇప్పటికీ అక్కమహాదేవి వచనాలు శివశరణాలనే పేరుతో ఎంతో ప్రచారంలో ఉన్నాయి. ఈ వచనాలలో మధుర భక్తే కాకుండా జ్ఞాన, వైరాగ్యాలకు సంబంధించిన ఎన్నో అంశాలు కనిపిస్తాయి. శ్రీశైల మల్లికార్జునునిలో ఐక్యం కావాలనే చిరకాలవాంఛ గల అక్కమహాదేవి తన జీవితపు చివరి రోజులను శ్రీశైలంలోనే గడిపింది.
ప్రస్తుతం అక్కమహాదేవి గుహలుగా పిలువబడుతున్న ఇక్కడి గుహలలో కొంతకాలం తపస్సు చేసిన ఈ సాధకురాలు ఇక్కడి కదళీవనంలో మరికొంతకాలం తపస్సుచేసి, ఈ కదళీవనంలోనే సిద్ధి పొందింది.
ఆలయప్రాంగణములోని అక్కమహాదేవివారికి ప్రతిరోజు కూడా పూజాదికాలు జరిపించబడుతున్నాయి.
ఈ కార్యక్రమములో కార్యనిర్వహణాధికారి శ్రీ యం. శ్రీనివాసరావు, సహాయ కార్యనిర్వహణాధికారి కె.వెంకటేశ్వరరావు, బి.మల్లికార్జునరెడ్డి, పర్యవేక్షకులు డి. రాధకృష్ణ, అర్చకస్వాములు, సంబంధిత అధికారులు పాల్గొన్నారు.
అక్కమహాదేవి జయంతిని పురస్కరించుకుని బుధవారం ( 01.04.2026) సాయంకాలం భ్రామరీ కళావేదిక ( నిత్యకళారాదన వేధిక) పై అక్కమహాదేవి జీవిత విశేషాలపై డా. ఎం. మహంతయ్య వారి ప్రవచన కార్యక్రమము ఏర్పాటు చేయబడింది.
( కార్యనిర్వహణాధికారి ఉత్తర్వుల మేరకు)
శ్రీశైలదేవస్థానం వారి ద్వారా జారీ
