బీసీ ఉద్యోగుల ప్రమోషన్లలో రిజర్వేషన్లు కల్పించాలి
బీసీ ఉద్యోగుల ప్రమోషన్లలో రిజర్వేషన్లు కల్పించాలి: ఎంపీ ఆర్. కృష్ణయ్య
కేంద్ర, రాష్ట్ర ప్రభుత్వాలు బీసీ ఉద్యోగులకు ప్రమోషన్లలో రిజర్వేషన్లు కల్పించాలని, అలాగే బీసీ రిజర్వేషన్లపై ఉన్న క్రిమిలేయర్ నిబంధనను వెంటనే ఎత్తివేయాలని జాతీయ బీసీ సంక్షేమ సంఘం అధ్యక్షులు, రాజ్యసభ ఎంపీ ఆర్. కృష్ణయ్య డిమాండ్ చేశారు. యాదాద్రి భువనగిరి జిల్లా మోత్కూరులో నిర్వహించిన బీసీ ఉద్యోగుల బహిరంగ సభకు ఆయన ముఖ్య అతిథిగా హాజరై ప్రసంగించారు. బీసీ ఉద్యోగులకు ప్రమోషన్ రిజర్వేషన్ల కోసం పార్లమెంటులో రాజ్యాంగ సవరణ బిల్లు పెడతామని ఆయన స్పష్టం చేశారు. మండల్ కమిషన్, నాచియప్పన్ కమిటీలతో పాటు సుప్రీంకోర్టు సైతం ప్రమోషన్లలో రిజర్వేషన్లకు అనుకూలంగా తీర్పులు ఇచ్చినప్పటికీ ప్రభుత్వాలు అన్యాయం చేస్తున్నాయని మండిపడ్డారు. ఎస్సీ, ఎస్టీ, మహిళా, వికలాంగుల రిజర్వేషన్లకు లేని క్రిమిలేయర్ నిబంధన కేవలం బీసీలకే విధించడం వివక్షకు నిదర్శనమన్నారు. చట్టసభల్లో బీసీలకు 50 శాతం రిజర్వేషన్లు కల్పించాలని, కేంద్రంలో ప్రత్యేక మంత్రిత్వ శాఖను ఏర్పాటు చేసి రూ.2 లక్షల కోట్లతో అభివృద్ధి పథకాలు ప్రకటించాలని డిమాండ్ చేశారు. ఈ మహాసభలో విద్యుత్ ఉద్యోగుల సంఘం రాష్ట్ర అధ్యక్షుడు కుమారస్వామి, ముత్యం వెంకన్న, బీసీ సంక్షేమ సంఘం రాష్ట్ర వర్కింగ్ ప్రెసిడెంట్ నీలం వెంకటేష్, బీసీ విద్యార్థి సంఘం రాష్ట్ర కన్వీనర్ పల్లగొర్ల మోదీరాందేవ్ యాదవ్, యాదగిరి, రామలింగం, డప్పు స్వామి, కలిమల నరసింహ, ఎడ్ల మహాలింగం, నరేష్ ముదిరాజ్, అంజి గౌడ్ తదితరులు పాల్గొన్నారు.
