చనుబండ జిల్లా పరిషత్ ఉన్నత పాఠశాల హిందీ ఉపాధ్యాయుడు రవి గుండెపోటుతో మృతి

చాట్రాయి : ఏలూరు జిల్లా నూజివీడు నియోజకవర్గం చాట్రాయి మండలం చనుబండ జిల్లా పరిషత్ హైస్కూల్లో హిందీ ఉపాధ్యాయుడిగా పనిచేస్తున్న హస్సావత్తు రవి(48) గుండెపోటుతో మృతి చెందారు. గురువారం ఉదయం ఛాతిలో నొప్పి రావడంతో కుటుంబ సభ్యులు వెంటనే విజయవాడ ప్రభుత్వాసుపత్రికి తరలించగా చికిత్స పొందుతూ కన్నుమూశారు.

రవికి భార్య లీలా, ఇద్దరు కుమార్తెలు, ఒక కుమారుడు ఉన్నారు. లీలా చాట్రాయి జిల్లా పరిషత్ హైస్కూల్లో తెలుగు పండిట్‌గా విధులు నిర్వహిస్తున్నారు. రవి స్వగ్రామం తెలంగాణ రాష్ట్రంలోని వేంసూరు మండలం కృష్ణాపురం కాగా, మృతదేహాన్ని అక్కడికి తరలిస్తున్నట్లు కుటుంబ సభ్యులు తెలిపారు.

ఉపాధ్యాయ వృత్తిలో మంచి పేరును సంపాదించుకున్న రవి ఆకస్మిక మృతి పట్ల సహచర ఉపాధ్యాయులు, గ్రామస్థులు దిగ్భ్రాంతి వ్యక్తం చేశారు. చాట్రాయి మండల ఉపాధ్యాయ సంఘాలు సంతాపం తెలియజేశాయి.