సోనాపూర్‌లో ఆవుల మందపైకి దూసుకెళ్లిన బొగ్గు లారీ..

గ్రామంలో ఉద్రిక్తత కొమురం భీమ్ ఆసిఫాబాద్ జిల్లా రెబ్బెన మండలం సోనాపూర్ గ్రామం వద్ద బొగ్గు లోడుతో వెళ్తున్న లారీ ఆవుల మందపైకి దూసుకెళ్లిన ఘటన కలకలం రేపింది. ఈ ప్రమాదంతో గ్రామంలో ఉద్రిక్త పరిస్థితులు నెలకొన్నాయి. సింగరేణి బొగ్గు లారీల కారణంగా ఈ ప్రాంతంలో తరచూ ప్రమాదాలు చోటుచేసుకుంటున్నాయని గ్రామస్తులు ఆగ్రహం వ్యక్తం చేస్తున్నారు. బొగ్గు లారీలు అతివేగంగా ప్రయాణించడం వల్లే ప్రమాదాలు జరుగుతున్నాయని ఆరోపిస్తున్నారు. ప్రజలు, పశువుల ప్రాణాలకు ముప్పు ఏర్పడుతున్నా సంబంధిత అధికారులు తగిన చర్యలు తీసుకోవడం లేదని అసహనం వ్యక్తం చేస్తున్నారు. ప్రమాదానికి సంబంధించిన పూర్తి వివరాలను సింగరేణి అధికారులు వెల్లడించాలని గ్రామస్తులు డిమాండ్ చేస్తున్నారు. బొగ్గు లారీల వేగాన్ని తక్షణమే నియంత్రించి, గ్రామాల మీదుగా ప్రయాణించే వాహనాల విషయంలో కఠిన నిబంధనలు అమలు చేయాలని, భవిష్యత్తులో ఇలాంటి ప్రమాదాలు పునరావృతం కాకుండా గ్రామస్తులకు భద్రత కల్పించాలని కోరుతున్నారు.