గ్రీన్‌కార్డ్ దరఖాస్తుదారులకు ఊరట.. అమెరికా విడిచి వెళ్లాల్సిన అవసరం లేదు
అమెరికాలో గ్రీన్‌కార్డ్ కోసం దరఖాస్తు చేసుకున్న వలసదారులకు ట్రంప్ ప్రభుత్వం కీలక ఊరటనిచ్చింది. గ్రీన్‌కార్డ్ తుది ప్రక్రియ పూర్తి చేసుకునేందుకు దరఖాస్తుదారులు తప్పనిసరిగా తమ స్వదేశాలకు వెళ్లాల్సిన అవసరం లేదని అమెరికా అంతర్గత భద్రతా శాఖ (DHS) స్పష్టం చేసింది.
మే 21న U.S. Citizenship and Immigration Services విడుదల చేసిన ప్రకటనతో వలసదారుల్లో ఆందోళన నెలకొనగా, తాజా వివరణతో ఆ సందిగ్ధతకు తెరపడింది. గ్రీన్‌కార్డ్ ప్రక్రియలో ఉన్నవారు అమెరికా విడిచి వెళ్లాల్సి వస్తుందనే ప్రచారాన్ని అధికారులు ఖండించారు.
ప్రస్తుతం అమల్లో ఉన్న ఇమిగ్రేషన్ నిబంధనల్లో ఎలాంటి మార్పులు చేయలేదని DHS వెల్లడించింది. గ్రీన్‌కార్డ్ దరఖాస్తులపై తుది నిర్ణయం పూర్తిగా ఇమిగ్రేషన్ అధికారుల విచక్షణాధికారాల ఆధారంగానే ఉంటుందని స్పష్టం చేసింది.
ఈ ప్రకటనతో అమెరికాలో గ్రీన్‌కార్డ్ కోసం ఎదురుచూస్తున్న వేలాది మంది వలసదారులకు భారీ ఉపశమనం లభించింది.
