కళ్ళు పోతున్నాయి... రాత్రి రోడ్లు యుద్ధభూములా మారుతున్నాయి!

కళ్ళు పోతున్నాయి... రాత్రి రోడ్లు యుద్ధభూములా మారుతున్నాయి!

ఎదురొచ్చే LED లైట్లతో వాహనదారుల విలవిల

హైబీమ్‌ల దాడితో ప్రమాదాల బారిన ప్రజలు

సగం బ్లాక్ స్టిక్కర్ రూల్ ఎక్కడ?.. అధికారులు నిద్రలోనా?

రాత్రి 7 గంటలు దాటితే చాలు... రోడ్డు మీదకు వాహనం తీసుకెళ్లాలంటేనే ప్రజలు వణికిపోతున్నారు. ఎదురుగా వచ్చే వాహనాల LED లైట్ల దాడితో కళ్ల ముందు ఒక్కసారిగా తెల్లటి వెలుగు పరచుకుని, కొన్ని క్షణాలు ఏమీ కనిపించని పరిస్థితి నెలకొంటోంది. “రోడ్డు మీద ప్రయాణమా.. లేక ప్రాణాలతో ఆటా?” అని వాహనదారులు ఆగ్రహం వ్యక్తం చేస్తున్నారు.

ప్రస్తుతం మార్కెట్‌లోకి వస్తున్న కొత్త వాహనాలన్నీ అధిక పవర్ LED లైట్లతో రోడ్లపైకి వస్తుండగా, వాటిపై నియంత్రణ మాత్రం పూర్తిగా గాలికొదిలేశారు. ముఖ్యంగా హైబీమ్ లైట్లు ఎదురుగా పడితే ద్విచక్ర వాహనదారుల పరిస్థితి దారుణంగా మారుతోంది. కళ్లలో మంట, చూపు మసకబారడం, రోడ్డు కనిపించక వాహనాలు అదుపు తప్పడం వంటి ఘటనలు రోజురోజుకూ పెరుగుతున్నాయి.

ఒకప్పుడు వాహనాల హెడ్‌లైట్లకు సగం వరకు బ్లాక్ స్టిక్కర్ లేదా బ్లాక్ పెయింట్ తప్పనిసరి అనే నిబంధన ఉండేది. దాంతో ఎదురుగా వచ్చే కాంతి తీవ్రత కొంతవరకు తగ్గేది. ఇప్పుడు ఆ రూల్‌ను ఎత్తేశారా?.. లేక అధికారులు మర్చిపోయారా? అన్న సందేహాలు వ్యక్తమవుతున్నాయి.

“LED లైట్లు కాదు... ఇవి చిన్న సూర్యుల్లా మారిపోయాయి” అంటూ ప్రజలు మండిపడుతున్నారు. ముఖ్యంగా గ్రామీణ రహదారులు, హైవేలపై రాత్రి ప్రయాణం నరకయాతనగా మారిందని వాపోతున్నారు.

ఇప్పటికైనా రవాణా శాఖ, ట్రాఫిక్ పోలీసులు కళ్లు తెరవాలని ప్రజలు డిమాండ్ చేస్తున్నారు. అధిక ప్రకాశం ఉన్న LED లైట్లపై ప్రత్యేక డ్రైవ్ నిర్వహించి నియంత్రణ చర్యలు తీసుకోవాలని, హైబీమ్ దుర్వినియోగంపై కఠిన చర్యలు చేపట్టాలని కోరుతున్నారు.

అలాగే పాత నిబంధనలను పునరుద్ధరించి, హెడ్‌లైట్లకు సగం వరకు బ్లాక్ స్టిక్కర్ లేదా బ్లాక్ పెయింట్ తప్పనిసరి చేయాలని ప్రజలు విజ్ఞప్తి చేస్తున్నారు. లేదంటే “రాత్రి ప్రయాణం అంటే ప్రమాదానికి ఆహ్వానం” అన్న పరిస్థితి మరింత పెరిగే ప్రమాదం ఉందని హెచ్చరిస్తున్నారు.