కోవిడ్ గుణపాఠం మరచిన కేంద్రం..? మహమ్మారుల పరిశోధన నిధులకు పూర్తిగా కోతపై ఆందోళన

న్యూఢిల్లీ, జూలై 31: కోవిడ్-19 మహమ్మారి దేశ ఆరోగ్య వ్యవస్థలో ఉన్న లోపాలను వెలుగులోకి తెచ్చినా, భవిష్యత్తులో ఇలాంటి మహమ్మారులను ఎదుర్కొనే విషయంలో కేంద్ర ప్రభుత్వం తగిన ప్రాధాన్యం ఇవ్వడం లేదనే విమర్శలు వ్యక్తమవుతున్నాయి. అంటువ్యాధుల నివారణ, ముందస్తు హెచ్చరిక వ్యవస్థలు, మహమ్మారుల పరిశోధన కోసం ఉద్దేశించిన ప్రత్యేక నిధులకు 2026-27 కేంద్ర బడ్జెట్‌లో ఒక్క రూపాయి కూడా కేటాయించకపోవడం వైద్య నిపుణుల్లో ఆందోళన కలిగిస్తోంది.

రాజ్యసభలో కేంద్ర ఆరోగ్య, కుటుంబ సంక్షేమ శాఖ సహాయ మంత్రి ప్రజాప్రావ్ జాధవ్ ఇచ్చిన లిఖితపూర్వక సమాధానం ప్రకారం, ఆరోగ్య పరిశోధన శాఖ బడ్జెట్ 2023-24లో రూ.2,892 కోట్ల నుంచి 2026-27లో రూ.4,821.21 కోట్లకు పెరిగింది. అయితే మహమ్మారుల నివారణ, వ్యాధుల పర్యవేక్షణ, కొత్త నిర్ధారణ పద్ధతుల అభివృద్ధికి ఉద్దేశించిన ప్రత్యేక పథకానికి నిధులు పూర్తిగా నిలిపివేయడం ప్రశ్నలు రేకెత్తిస్తోంది.

ఏటికేడూ తగ్గిన నిధులు.. చివరకు సున్నా

ఈ పథకానికి 2023-24లో రూ.10 కోట్లు, 2024-25లో రూ.8 కోట్లు, 2025-26లో రూ.3.67 కోట్లు మాత్రమే కేటాయించగా, 2026-27లో పూర్తిగా నిధులు నిలిపివేయడం గమనార్హం. భవిష్యత్తులో ఉద్భవించే కొత్త అంటువ్యాధులను ముందుగానే గుర్తించడం, నిరోధించడం, పరిశోధనలు చేపట్టడం ఈ పథకం ప్రధాన లక్ష్యం.

ప్రపంచ ఆరోగ్య సంస్థ హెచ్చరికల మధ్య నిర్ణయం

కోవిడ్ అనంతరం కూడా ఎంపాక్స్, హెచ్5ఎన్1 పక్షుల ఫ్లూ వంటి కొత్త అంటువ్యాధుల ముప్పు కొనసాగుతుండటంతో, వ్యాధులపై నిరంతర పరిశోధనలు, ముందస్తు హెచ్చరిక వ్యవస్థలు బలోపేతం చేయాలని ప్రపంచ ఆరోగ్య సంస్థ పదేపదే సూచిస్తోంది. ఇలాంటి సమయంలో ప్రత్యేక పరిశోధన నిధులను నిలిపివేయడం భవిష్యత్తు ప్రజారోగ్య భద్రతపై ప్రభావం చూపే అవకాశం ఉందని నిపుణులు హెచ్చరిస్తున్నారు.

కేంద్రం ఏమంటోంది?

మహమ్మారుల సన్నద్ధత కోసం ఇతర పథకాల ద్వారా నిధులు కేటాయిస్తున్నామని కేంద్ర ప్రభుత్వం చెబుతోంది. ప్రధానమంత్రి ఆయుష్మాన్ భారత్ హెల్త్ ఇన్‌ఫ్రాస్ట్రక్చర్ మిషన్ కింద బయోసెక్యూరిటీ, మహమ్మారి పరిశోధనలు, నేషనల్ వన్ హెల్త్ మిషన్ కోసం రూ.351.06 కోట్లు, వైరల్ రీసెర్చ్ అండ్ డయాగ్నస్టిక్ ల్యాబొరేటరీస్‌కు రూ.70 కోట్లు, వైద్య కళాశాలల పరిశోధన యూనిట్లకు రూ.100.27 కోట్లు కేటాయించినట్లు పేర్కొంది.

స్పష్టత లేని పరిస్థితి

అయితే ప్రత్యేక మహమ్మారుల పరిశోధన పథకాన్ని పూర్తిగా రద్దు చేశారా, లేక ఇతర పథకాలలో విలీనం చేశారా అన్న అంశంపై ప్రభుత్వం స్పష్టత ఇవ్వలేదు. దీంతో ఈ నిర్ణయం భవిష్యత్ అంటువ్యాధుల పరిశోధన, ప్రజారోగ్య భద్రతపై ప్రతికూల ప్రభావం చూపుతుందనే అభిప్రాయాలు వ్యక్తమవుతున్నాయి.

నిపుణుల అభిప్రాయం ప్రకారం, సాధారణ ఆరోగ్య మౌలిక వసతులతో పాటు మహమ్మారులను ముందుగానే గుర్తించి అడ్డుకునే పరిశోధనలకు ప్రత్యేక నిధులు కేటాయించడం కూడా అంతే కీలకం. ఈ నేపథ్యంలో కేంద్ర ప్రభుత్వం తన విధానాన్ని పునఃసమీక్షించాలని వారు సూచిస్తున్నారు.