కరీంనగర్‌లో పోలీస్ స్టేషన్ నుంచే పోలీస్ వాహనం చోరీ..!!

కరీంనగర్: పోలీస్ స్టేషన్‌లో భద్రతగా ఉండాల్సిన పోలీస్ వాహనానికే దొంగలు ఎసరు పెట్టారు. కరీంనగర్ రూరల్ పోలీస్ స్టేషన్‌లో ఉంచిన పెట్రోలింగ్ వాహనాన్ని అర్థరాత్రి గుర్తు తెలియని వ్యక్తి ఎత్తుకెళ్లడం కలకలం రేపింది.

వాహనాన్ని చోరీ చేసిన వ్యక్తి రాత్రంతా అదే వాహనంలో తిరిగినట్లు తెలుస్తోంది. అనంతరం తెల్లవారుజామున వరంగల్ వైపు వెళ్తుండగా ఎల్కతుర్తి వద్ద వాహనానికి ప్రమాదం జరిగింది.

ప్రమాదం విషయం తెలుసుకున్న పోలీసులు వెంటనే అక్కడికి చేరుకుని వాహనాన్ని స్వాధీనం చేసుకున్నారు. వాహనాన్ని ఎవరు చోరీ చేశారు? ఏ ఉద్దేశంతో తీసుకెళ్లారు? రాత్రంతా ఎక్కడెక్కడ తిరిగారు? అనే కోణాల్లో పోలీసులు దర్యాప్తు చేస్తున్నారు. పోలీస్ స్టేషన్ నుంచే పోలీస్ వాహనం చోరీ కావడం స్థానికంగా తీవ్ర చర్చనీయాంశంగా మారింది.