పేటలో 'కల్తీ' మాయాజాలం,
పేటలో 'కల్తీ' మాయాజాలం, లాభాల కోసం ప్యాకెట్ పాలతో గేదె పాల మిక్సింగ్!
చిలకలూరిపేట:మారుతున్న కాలంతో పాటు ప్రజల్లో ఆరోగ్యంపై శ్రద్ధ పెరిగింది. ఈ క్రమంలోనే పట్టణంలోని వినియోగదారులు ఆరోగ్య పరంగా పలు జాగ్రత్తలు పాటిస్తున్నారు. లీటరుకు పది రూపాయలు ఎక్కువైనా సరే, మార్కెట్లో లభించే రసాయనాలతో కూడిన ‘పాలు ప్యాకెట్లు’ మనకు వద్దు... స్వచ్ఛమైన ‘గేదె పాలే ముద్దు’ అంటూ కొంతమంది రేటు ఎక్కువ పెట్టి మరీ గేదె పాలు పోయించుకుంటున్నారు. అయితే, ప్రజల నమ్మకాన్ని కొంతమంది పాలు పోసే వ్యక్తులు తమకు అనుకూలంగా మార్చుకుంటూ కాసుల కక్కుర్తికి తెరలేపారు.తమ వద్ద ఉన్న గేదెల సామర్థ్యం కంటే, ఎక్కువ మంది ఖాతాదారులను కస్టమర్లను అడ్డగోలుగా ఒప్పేసుకుంటున్నారు. తీరా డిమాండ్‌కు తగ్గట్టుగా పాలు సరిపోకపోవడంతో, అధిక లాభాల కోసం ఒక సరికొత్త మార్గాన్ని ఎంచుకున్నారు. డైరీల వద్ద దొరికే తక్కువ ధర ప్యాకెట్ పాలను కొనుగోలు చేసి, వాటిని స్వచ్ఛమైన గేదె పాలలో గుట్టుచప్పుడు కాకుండా కలిపేస్తున్నారు. ఆపై ఏమీ తెలియనట్టుగా ఖాతాదారుల ఇళ్లకు వెళ్లి "స్వచ్ఛమైన గేదె పాలు" అంటూ యథేచ్ఛగా అమ్మకాలు సాగిస్తూ ప్రజల ఆరోగ్యంతో ఆటలాడుకుంటున్నారు.
