రోడ్లు, పార్కుల స్థలాలకు ఎల్‌ఆర్‌ఎస్‌ వర్తించదు: తెలంగాణ హైకోర్టు

హైదరాబాద్, జూన్ 23:

లేఔట్లలో రోడ్లు, పార్కులు, ప్రజావసరాల కోసం కేటాయించిన భూములకు లేఔట్ రెగ్యులరైజేషన్ స్కీమ్ (LRS) వర్తించదని తెలంగాణ హైకోర్టు స్పష్టం చేసింది.

గిఫ్ట్ డీడ్ ద్వారా మున్సిపల్ సంస్థలకు అప్పగించిన స్థలాలు తిరిగి డెవలపర్లు లేదా వ్యక్తుల అధీనంలోకి రావని, అలాంటి భూములకు ఎల్‌ఆర్‌ఎస్‌ మంజూరు చేయడం చట్టబద్ధం కాదని న్యాయస్థానం పేర్కొంది.

అయితే, మున్సిపల్ అధికారుల లేఖ ఆధారంగా మాత్రమే ఇప్పటికే జరిగిన భూమి రిజిస్ట్రేషన్‌ను ఏకపక్షంగా రద్దు చేయడం సరైన విధానం కాదని హైకోర్టు అభిప్రాయపడింది.

రిజిస్ట్రేషన్ రద్దు చేయాలంటే ఇరుపక్షాల సమ్మతి లేదా సంబంధిత కోర్టు ఆదేశాలు తప్పనిసరిగా ఉండాలని న్యాయస్థానం తేల్చిచెప్పింది.

ఈ తీర్పు లేఔట్లలో ప్రజావసరాల కోసం కేటాయించిన భూముల పరిరక్షణకు కీలకంగా మారనుంది.