తిరువూరులో ఘనంగా హర్ ఘర్ తిరంగా కార్యక్రమం

తిరువూరులో ఘనంగా హర్ ఘర్ తిరంగా కార్యక్రమం

ఎన్టీఆర్ జిల్లా తిరువూరు నియోజకవర్గం తిరువూరులో గురువారం హర్ ఘర్ తిరంగా కార్యక్రమాన్ని ఘనంగా నిర్వహించారు. ఆర్డీవో ఏ. కుమార్ జాతీయ జెండాను ఊపి తిరంగా ర్యాలీని ప్రారంభించారు.

ఈ సందర్భంగా నిర్వహించిన సభలో ఆర్డీవో మాట్లాడుతూ.. దేశం స్వాతంత్ర్యం సాధించి 80 సంవత్సరాలు పూర్తయిన చారిత్రాత్మక సందర్భంగా ప్రతి పౌరుడు స్వాతంత్ర్య సమరయోధుల త్యాగాలను స్మరించుకుంటూ దేశ అభివృద్ధిలో భాగస్వాములు కావాలని పిలుపునిచ్చారు.

నేటి విద్యార్థులే రేపటి దేశ భవిష్యత్తు అని పేర్కొంటూ.. విద్యార్థులు దేశభక్తి భావంతో పాటు క్రమశిక్షణ, నిజాయితీ వంటి విలువలను అలవర్చుకుని ఉత్తమ పౌరులుగా ఎదగాలని సూచించారు. స్వాతంత్ర్య సమరయోధుల చరిత్రను తెలుసుకుని, వారి ఆదర్శాలను ఆచరణలో పెట్టాలని పిలుపునిచ్చారు.

ర్యాలీలో ప్రభుత్వ, ప్రైవేటు పాఠశాలలకు చెందిన విద్యార్థులు, ఉపాధ్యాయులు ఉత్సాహంగా పాల్గొన్నారు. విద్యార్థులు చేతుల్లో జాతీయ జెండాలు పట్టుకుని దేశభక్తి నినాదాలు చేస్తూ ర్యాలీ నిర్వహించడంతో పట్టణంలో దేశభక్తి వాతావరణం నెలకొంది. వివిధ శాఖల అధికారులు, ఉద్యోగులు పెద్ద సంఖ్యలో పాల్గొని జాతీయ భావాన్ని చాటారు.

కార్యక్రమంలో తహసీల్దార్ డీ. చంద్రమౌళి, మున్సిపల్ కమిషనర్ మనోజ్, డీవైఓ శ్యాంసుందర్, ఎస్సైలు శాతకర్ణి, గౌరీశ్వరి తదితరులు పాల్గొన్నారు.