వినాయక మండపాలకు ఆన్‌లైన్ పోలీసు అనుమతి తప్పనిసరి
మదనపల్లెలో శాంతి కమిటీ సమావేశం.. నిబంధనలు ఉల్లంఘిస్తే కఠిన చర్యలు
మదనపల్లె | Ntoday News
వినాయక చవితి వేడుకలను ప్రశాంతంగా, సురక్షితంగా నిర్వహించేందుకు అన్నమయ్య జిల్లా మదనపల్లెలో శాంతి కమిటీ సమావేశం నిర్వహించారు. జిల్లా కలెక్టర్ నిశాంత్ కుమార్, ఎస్పీ ధీరజ్ కునుబిల్లి ఆధ్వర్యంలో జరిగిన సమావేశంలో వినాయక మండపాల ఏర్పాటు, భద్రత, నిమజ్జనం, పర్యావరణ పరిరక్షణకు సంబంధించిన పలు సూచనలు చేశారు.
వినాయక మండపాల ఏర్పాటుకు ఆన్‌లైన్‌లో పోలీసుల అనుమతి తప్పనిసరిగా తీసుకోవాలని అధికారులు స్పష్టం చేశారు. పర్యావరణ పరిరక్షణలో భాగంగా మట్టి వినాయక విగ్రహాలను మాత్రమే ప్రతిష్ఠించి పూజించాలని సూచించారు.
ప్రతి వినాయక మండపం వద్ద తప్పనిసరిగా అగ్నిమాపక భద్రతా ఏర్పాట్లు ఉండేలా చూసుకోవాలని అధికారులు తెలిపారు. రాత్రి 10 గంటల తర్వాత లౌడ్‌స్పీకర్ల వినియోగం చేయరాదని స్పష్టం చేశారు. వినాయక నిమజ్జనం సమయంలో ఎవరూ మద్యం సేవించరాదని సూచించారు.
శాంతిభద్రతలకు విఘాతం కలిగించేలా వ్యవహరించినా, నిబంధనలను ఉల్లంఘించినా చట్ట ప్రకారం కఠిన చర్యలు తీసుకుంటామని జిల్లా ఎస్పీ ధీరజ్ కునుబిల్లి హెచ్చరించారు. పండుగను అందరూ పరస్పర సహకారంతో శాంతియుత వాతావరణంలో నిర్వహించాలని కోరారు.
ఈ సమావేశంలో జాయింట్ కలెక్టర్ శివ్ నారాయణ్ శర్మ, సబ్ కలెక్టర్ చల్లా కళ్యాణి, అడిషనల్ ఎస్పీ ఎం. వెంకటాద్రి, పోలీసు శాఖతో పాటు వివిధ ప్రభుత్వ శాఖల అధికారులు, శాంతి కమిటీ సభ్యులు పాల్గొన్నారు.
