వట్టిమర్తి ఎంపిఎల్ లాజిస్టిక్స్ హబ్పై కలెక్టరేట్లో ఫిర్యాదు
నల్గొండ జిల్లా చిట్యాల మండలం పరిధిలో ఉన్న వట్టిమర్తి గ్రామ శివారులో ఉన్న ఎంపిఎల్ లాజిస్టిక్ హబ్ పరిశ్రమ గ్రామపంచాయతీకి ఎలాంటి పన్నులు చెల్లించకుండా, ముందస్తు అనుమతులు లేకుండా చట్టవిరుద్ధంగా నడుస్తోందని ఆసరా స్వచ్ఛంద సేవా సంస్థ చైర్మన్ మేడి హరికృష్ణ ఆరోపించారు. ఈ విషయమై సోమవారం ఆయన ఒక ప్రకటన విడుదల చేయడంతో పాటు, నల్గొండ జిల్లా కలెక్టర్ కార్యాలయంలో వినతి పత్రం అందజేశారు. ఈ సందర్భంగా ఆయన మాట్లాడుతూ, స్థానిక అధికారుల ఉదాసీనత వల్లే గ్రామ పంచాయతీకి రావాల్సిన భారీ ఆదాయానికి గండి పడుతోందని ఆవేదన వ్యక్తం చేశారు.
ఉన్నతాధికారులు తక్షణమే స్పందించి సదరు పరిశ్రమపై చట్టపరమైన చర్యలు తీసుకోవాలని, బకాయి పన్నులను వసూలు చేసి వట్టిమర్తి గ్రామాభివృద్ధికి ఉపయోగించాలని డిమాండ్ చేశారు. అధికారులు స్పందించి యాక్షన్ ప్లాన్ తీసుకోకపోతే, గ్రామస్తులను ఏకం చేసి పెద్ద ఎత్తున ఆందోళనలు చేపడతామని హరికృష్ణ హెచ్చరించారు.
