వర్షంలోనూ కొనసాగిన వినాయక నిమజ్జన శోభాయాత్ర
లక్షెట్టిపేట: మంచిర్యాల జిల్లా లక్షెట్టిపేట మండలం వెంకట్రావుపేట గ్రామంలో వేపాల్ భక్త మండలి ఆధ్వర్యంలో ఏర్పాటు చేసిన వినాయకుడి నిమజ్జన శోభాయాత్ర భక్తిశ్రద్ధల మధ్య కొనసాగింది.
వినాయక విగ్రహాన్ని నిమజ్జనానికి తరలిస్తుండగా మహిళలు భక్తిగీతాలకు అనుగుణంగా నృత్యాలు చేస్తూ శోభాయాత్రలో పాల్గొన్నారు. భక్తులు వినాయకుడి నామస్మరణతో ముందుకు సాగారు.
శోభాయాత్ర కొంత దూరం వెళ్లిన అనంతరం ఉరుములు, మెరుపులతో భారీ వర్షం కురిసింది. అయినప్పటికీ భక్తులు వర్షాన్ని లెక్కచేయకుండా శోభాయాత్రను కొనసాగించారు. మహిళలు నృత్యాలు చేస్తూ, భక్తులు నినాదాలు చేస్తూ ఉత్సాహంగా పాల్గొనడంతో గ్రామంలో పండుగ వాతావరణం నెలకొంది.
“గణపతి బప్పా మోరియా.. వచ్చే ఏడాది మళ్లీ రావయ్యా” అంటూ భక్తులు చేసిన నినాదాలతో వెంకట్రావుపేట వీధులు మార్మోగాయి. వర్షం మధ్య కొనసాగిన నిమజ్జన శోభాయాత్ర స్థానికులను ఆకట్టుకుంది.
