చిత్తపూరులో అధికారుల నిర్లక్ష్యంపై మంత్రి పార్థసారథి ఆగ్రహం

చిత్తపూరులో అధికారుల నిర్లక్ష్యంపై మంత్రి పార్థసారథి ఆగ్రహం

రెండు రోజుల్లో సమస్యలు పరిష్కరించకపోతే సస్పెన్షన్‌ తప్పదు

పంచాయతీ కార్యదర్శి, ఎంపీడీఓ, విద్యుత్‌ ఏఈపై తీవ్ర ఆగ్రహం

చాట్రాయి/నూజివీడు, సెప్టెంబరు 5:

చాట్రాయి మండలం చిత్తపూరు గ్రామంలో ప్రజా సమస్యలపై అధికారుల నిర్లక్ష్యంపై రాష్ట్ర గృహ నిర్మాణ, సమాచార పౌర సంబంధాల శాఖ మంత్రి కొలుసు పార్థసారథి తీవ్ర ఆగ్రహం వ్యక్తం చేశారు. గ్రామంలో తాగునీరు, విద్యుత్‌, వీధి దీపాలు, డ్రైనేజీ సమస్యలు పరిష్కరించడంలో అధికారులు విఫలమయ్యారంటూ ప్రజలు మంత్రికి ఫిర్యాదు చేయడంతో ఆయన అక్కడికక్కడే సంబంధిత అధికారులను పిలిపించి నిలదీశారు.

గ్రామంలో గత ఐదు రోజులుగా తాగునీరు అందడం లేదని, గత ఏడాది నుంచి విద్యుత్‌ సరఫరా సక్రమంగా లేదని ప్రజలు ఆవేదన వ్యక్తం చేశారు. వీధి దీపాలు వెలగకపోవడంతో రాత్రివేళ ఇబ్బందులు పడుతున్నామని, డ్రైనేజీ సమస్యతో తీవ్ర అవస్థలు ఎదుర్కొంటున్నామని తెలిపారు. విద్యుత్‌ సమస్యలపై లైన్‌మెన్‌కు ఎన్నిసార్లు ఫిర్యాదు చేసినా స్పందించడం లేదని, ఫోన్‌ చేసినా కనీసం సమాధానం ఇవ్వడం లేదని మంత్రి దృష్టికి తీసుకెళ్లారు.

అధికారుల సమాధానాలతో మండిపాటు

ప్రజల ఫిర్యాదులపై మంత్రి వెంటనే సంబంధిత అధికారులను అక్కడికే పిలిపించారు. పంచాయతీ కార్యదర్శి, ఎంపీడీఓ, గ్రామీణ నీటి సరఫరా విభాగం అధికారి, విద్యుత్‌ సహాయ ఇంజినీర్‌, లైన్‌మెన్‌లను సమస్యలపై వివరణ కోరారు. అయితే అధికారులు పొంతనలేని సమాధానాలు ఇవ్వడంతో మంత్రి తీవ్ర అసహనం వ్యక్తం చేశారు.

“ఒళ్లు దగ్గర పెట్టుకుని పనిచేయాలి. ఉద్యోగం చేస్తున్న గ్రామాల్లోనే నివసించాలి. పట్టణాల్లో ఉంటూ విధులకు గైర్హాజరవడం, ప్రజల ఫోన్లకు స్పందించకపోవడం కుదరదు. ప్రభుత్వ నిబంధనలను ఉల్లంఘిస్తే సహించేది లేదు” అని మంత్రి హెచ్చరించారు.

నిర్లక్ష్యంపై చర్యలకు ఆదేశం

ప్రజల సమస్యల పరిష్కారంలో నిర్లక్ష్యంగా వ్యవహరించిన అధికారులపై ఉన్నతాధికారులకు ఫిర్యాదు చేసి, నిబంధనల ప్రకారం కఠిన చర్యలు తీసుకోవాలని మంత్రి ఆదేశించారు. బాధ్యతల్లో నిర్లక్ష్యం వహించే సిబ్బందిని ఉపేక్షించబోమని స్పష్టం చేశారు.

రెండు రోజుల గడువు

తాగునీరు, వీధి దీపాలు, డ్రైనేజీ, విద్యుత్‌ తదితర అత్యవసర సమస్యలను రెండు రోజుల్లోగా పూర్తిగా పరిష్కరించాలని అధికారులను మంత్రి ఆదేశించారు. గడువులోగా సమస్యలు పరిష్కారం కాకపోతే బాధ్యులపై చర్యలు తప్పవని, అవసరమైతే సస్పెన్షన్‌కు సిఫారసు చేస్తామని హెచ్చరించారు.

ప్రజల నుంచి వచ్చే ఫిర్యాదులను తక్షణమే పరిష్కరించాల్సిన బాధ్యత అధికారులపై ఉందని, ప్రభుత్వ సేవలు ప్రజలకు అందుబాటులో ఉండేలా పనిచేయాలని మంత్రి స్పష్టం చేశారు.

ఈ సందర్భంగా నక్కలపు పుల్లారావు, రజిని తదితర గ్రామ ప్రజలు తమ సమస్యలను మంత్రికి వివరించారు. కార్యక్రమంలో కూటమి నాయకులు, అధికారులు, గ్రామ ప్రజలు పాల్గొన్నారు.