పంజాగుట్టలో సైబర్ మోసం.. ఫోన్ కాల్‌తో రూ.2.5 లక్షలు స్వాహా

 హైదరాబాద్‌లో సైబర్ నేరగాళ్లు కొత్త తరహా మోసానికి పాల్పడ్డారు. ఎల్లారెడ్డిగూడకు చెందిన మాజీ సైనికోద్యోగి రాజవర్ధన్ తన ఫోన్‌లో ప్రకటన చూస్తుండగా గుర్తుతెలియని నంబర్ నుంచి వచ్చిన కాల్‌ను స్వీకరించారు. అవతలి వ్యక్తితో మాట్లాడి కాల్ ముగించిన కొద్దిసేపటికే ఆయన ఫోన్‌లో ఏపీకే ఫైల్ డౌన్‌లోడ్ అయినట్లు గుర్తించారు. అనంతరం ఆయన బ్యాంకు ఖాతా నుంచి రూ.2.5 లక్షలు వేరే ఖాతాకు బదిలీ అయ్యాయి. దీంతో బాధితుడు పంజాగుట్ట పోలీసులను ఆశ్రయించి ఫిర్యాదు చేశారు. ఫిర్యాదు మేరకు కేసు నమోదు చేసిన పోలీసులు సైబర్ మోసంపై దర్యాప్తు చేస్తున్నారు.