ఫేస్‌బుక్ పరిచయం.. పెళ్లి పేరుతో మహిళకు రూ.2.16 లక్షల టోకరా

 హైదరాబాద్‌లోని శ్రీకృష్ణానగర్‌కు చెందిన షేక్ సూర్జహాన్ అనే యువతిని ఫేస్‌బుక్‌లో పెళ్లి సంబంధాల ప్రకటన ద్వారా పరిచయమైన కబీర్ అనే వ్యక్తి మోసం చేశాడు. లండన్‌లో వ్యాపారం చేస్తున్నానని, యువతిని పెళ్లి చేసుకుంటానని నమ్మించి వాట్సాప్ ద్వారా ఆమెకు దగ్గరయ్యాడు. ఇండియాకు వస్తుండగా ఢిల్లీ విమానాశ్రయంలో కస్టమ్స్ అధికారులు తన 33 తులాల బంగారం, రూ.2.75 కోట్ల నగదును పట్టుకున్నారని కబీర్ నమ్మబలికాడు. వాటిని విడిపించుకోవడానికి డబ్బులు అవసరమని చెప్పడంతో అతడి మాటలు నమ్మిన యువతి రెండు విడతలుగా రూ.2.16 లక్షలు పంపించింది. అనంతరం విమాన టికెట్ చూపించాలని యువతి కోరగా కబీర్ నుంచి ఎలాంటి స్పందన రాలేదు. దీంతో తాను మోసపోయినట్లు గుర్తించిన బాధితురాలు పోలీసులను ఆశ్రయించి ఫిర్యాదు చేసింది. ఈ ఘటనపై పోలీసులు కేసు నమోదు చేసి దర్యాప్తు చేపట్టారు.