హనుమకొండ అదాలత్ జంక్షన్లోని లింగాల కేదారి హోటల్లో భారీ అగ్ని ప్రమాదం
హనుమకొండలో ఘోర అగ్ని ప్రమాదం.. సేవామూర్తి లింగాల కేదారి మృతి
లింగాల కేదారి హోటల్లో భారీగా చెలరేగిన మంటలు.. భార్య పరిస్థితి విషమం
హనుమకొండ | N ltoday News
హనుమకొండ అదాలత్ జంక్షన్లోని లింగాల కేదారి హోటల్లో బుధవారం భారీ అగ్ని ప్రమాదం చోటుచేసుకుంది. ఈ ఘటనలో హోటల్ యజమాని లింగాల కేదారి, ఆయన భార్య తీవ్రంగా గాయపడ్డారు. కేదారిని ఆస్పత్రికి తరలిస్తుండగా మృతి చెందగా.. ఆయన భార్య తీవ్ర గాయాలతో చికిత్స పొందుతున్నారు. ఆమె పరిస్థితి విషమంగా ఉన్నట్లు సమాచారం.
అగ్ని ప్రమాదం సమాచారం అందుకున్న పోలీసులు, ఇతర సిబ్బంది వెంటనే ఘటనా స్థలానికి చేరుకుని సహాయక చర్యలు చేపట్టారు. తీవ్రంగా గాయపడిన దంపతులను వరంగల్ ఎంజీఎం ఆస్పత్రికి తరలించారు. అయితే ఆస్పత్రికి తరలించే క్రమంలోనే కేదారి మృతి చెందినట్లు సమాచారం.
ఉద్యమకారులకు అండగా నిలిచిన కేదారి
లింగాల కేదారి కేవలం హోటల్ యజమానిగానే కాకుండా సామాజిక సేవకుడిగా ఓరుగల్లు ప్రజలకు సుపరిచితుడు. తెలంగాణ ఉద్యమం ఉవ్వెత్తున సాగిన సమయంలో అదాలత్ సెంటర్లోని అమరవీరుల స్తూపం వద్దకు వచ్చే విద్యార్థులు, ఉద్యమకారులకు కేదారి దంపతులు తమ హోటల్ ద్వారా ఉచితంగా టీ, టిఫిన్, భోజనాలు అందించేవారని ఆయనను గుర్తు చేసుకున్నవారు చెబుతున్నారు.
ఉద్యమకారుల కష్టాలను తన కష్టాలుగా భావించి వారికి ఆహారం అందించడాన్ని సేవగా భావించారని, లాభాల కంటే మానవీయతకు ప్రాధాన్యం ఇచ్చేవారని పేర్కొన్నారు. ఎలాంటి ప్రతిఫలం ఆశించకుండా చేసిన ఈ సేవలు కేదారికి ప్రత్యేక గుర్తింపును తీసుకొచ్చాయి.
‘ఫుడ్ వేస్ట్ చేయొద్దు’ అంటూ అవగాహన
ఆహారాన్ని వృథా చేయొద్దనే సందేశాన్ని ప్రజల్లోకి తీసుకెళ్లడంలోనూ కేదారి చురుకుగా వ్యవహరించారు. ఆకలితో ఉన్న వారికి ఆహారం అందించడం ఎంత ముఖ్యమో.. అందుబాటులో ఉన్న ఆహారాన్ని వృథా చేయకుండా చూడటం కూడా అంతే ముఖ్యమని ప్రజలకు అవగాహన కల్పించారు.
‘ఫుడ్ వేస్ట్ చేయొద్దు’ అనే సందేశాన్ని వరంగల్ ప్రజల్లోకి తీసుకెళ్లారు. హోటల్ను కేవలం వ్యాపార కేంద్రంగా కాకుండా నలుగురికి ఉపయోగపడే వేదికగా తీర్చిదిద్దారని ఆయన సేవలను గుర్తుచేసుకుంటున్నవారు చెబుతున్నారు.
మోదీతో ‘మన్కీ బాత్’లో సంభాషణ
కేదారి సేవా కార్యక్రమాలకు జాతీయ స్థాయిలోనూ గుర్తింపు లభించింది. సుమారు రెండేళ్ల క్రితం ప్రధానమంత్రి నరేంద్ర మోదీ ‘మన్కీ బాత్’ కార్యక్రమంలో భాగంగా కేదారితో మాట్లాడినట్లు సమాచారం. సాధారణ హోటల్ను నిర్వహిస్తూ సామాజిక సేవకు ప్రాధాన్యం ఇచ్చిన కేదారికి ప్రధానమంత్రితో మాట్లాడే అవకాశం రావడం ఆయన సేవా ప్రస్థానానికి లభించిన గుర్తింపుగా నిలిచింది.
సేవా జీవితం విషాదాంతం
ఎంతోమంది ఆకలి తీర్చిన కేదారి చేతులు చివరకు అగ్ని ప్రమాదంలో ఆగిపోవడంతో ఆయనను అభిమానించే వారిలో విషాదం నెలకొంది. ఉద్యమకారులకు ఉచితంగా ఆహారం అందించిన రోజులు, ఆహారం వృథా చేయొద్దంటూ చేసిన ప్రచారం, అవసరమైన వారికి అందించిన సహాయాన్ని పలువురు గుర్తుచేసుకుంటున్నారు.
కేదారి మృతితో ఓరుగల్లు ప్రజలు తీవ్ర దిగ్భ్రాంతికి గురయ్యారు. హోటల్ యజమానిగా కాకుండా సేవామూర్తిగా గుర్తింపు పొందిన లింగాల కేదారి చేసిన సామాజిక సేవలు హనుమకొండ ప్రజల జ్ఞాపకాల్లో నిలిచిపోతాయని పలువురు పేర్కొన్నారు.
