పగటిపూటే ప్రజాధనానికి చితి.. చాట్రాయిలో వెలుగుతున్న వీధి దీపాలపై ప్రజల ఆగ్రహం

ఏలూరు జిల్లా నూజివీడు నియోజకవర్గం చాట్రాయి మండలంలోని పలు గ్రామాల్లో పగటిపూట కూడా వీధి దీపాలు వెలుగుతుండటం తీవ్ర విమర్శలకు దారితీస్తోంది. రాత్రివేళ ప్రజలకు వెలుగు పంచాల్సిన స్ట్రీట్ లైట్లు, ఉదయం సూర్యుడు ఉదయించిన తర్వాత కూడా గంటల తరబడి వెలుగుతుండటంతో గ్రామస్తులు తీవ్ర ఆగ్రహం వ్యక్తం చేస్తున్నారు. “ఇది విద్యుత్ వెలుగా.. ప్రజాధన దహనమా?” అంటూ మండిపడుతున్నారు.

పంచాయతీ సర్పంచ్‌ల పదవీకాలం ముగిసిన తర్వాత దాదాపు నాలుగు నెలలుగా ప్రత్యేక అధికారుల పాలన కొనసాగుతున్నప్పటికీ, గ్రామాల్లో కనీస పర్యవేక్షణ కూడా లేకుండా పోయిందని ప్రజలు ఆరోపిస్తున్నారు. కొత్త లైట్లు ఏర్పాటు చేయడం దూరంగా ఉండగా, ఇప్పటికే ఉన్న వీధి దీపాల నిర్వహణపైనా తీవ్ర నిర్లక్ష్యం నెలకొన్నదని అంటున్నారు.

తెల్లవారగానే ఆపివేయాల్సిన వీధి దీపాలు ఉదయం నుంచి సాయంత్రం వరకు వెలుగుతూనే ఉండగా, సంబంధిత అధికారులు మాత్రం చూసీచూడనట్టుగా వ్యవహరిస్తున్నారని గ్రామస్తులు విమర్శిస్తున్నారు. ఒకవైపు విద్యుత్ పొదుపుపై ప్రభుత్వం ప్రచారాలు నిర్వహిస్తుంటే, మరోవైపు అధికారుల నిర్లక్ష్యంతో వేలాది యూనిట్ల కరెంట్ బహిరంగంగానే వృథా అవుతోందని ఆగ్రహం వ్యక్తం చేస్తున్నారు.

“పగటిపూట వీధి దీపాల వెలుగు ఎవరికోసం? ప్రజల డబ్బుతో ఇలా నిర్లక్ష్యంగా వ్యవహరించడం సమంజసమేనా?” అంటూ స్థానికులు ప్రశ్నిస్తున్నారు. పంచాయతీ ఖజానా నుంచి చెల్లిస్తున్న విద్యుత్ బిల్లులు రోజురోజుకూ పెరుగుతుండటంతో ప్రజాధనం నీళ్లలా పారిపోతోందని విమర్శిస్తున్నారు.

కొన్ని గ్రామాల్లో నెలల తరబడి ఇదే పరిస్థితి కొనసాగుతున్నా ఒక్క అధికారి కూడా స్పందించకపోవడం ఆశ్చర్యానికి గురిచేస్తోందని స్థానికులు చెబుతున్నారు. ఆటోమేటిక్ టైమర్లు పనిచేయకపోవడం లేదా విధుల్లో నిర్లక్ష్యం కారణంగానే ఈ పరిస్థితి ఏర్పడిందని ఆరోపిస్తున్నారు.

ఇక పగలు–రాత్రి తేడా లేకుండా దీపాలు నిరంతరం వెలుగుతుండటంతో వాటి జీవితకాలం కూడా తగ్గిపోతోందని ప్రజలు ఆవేదన వ్యక్తం చేస్తున్నారు. బల్బులు త్వరగా మాడిపోవడంతో మళ్లీ కొత్త పరికరాల కొనుగోలు పేరుతో పంచాయతీలపై అదనపు ఆర్థిక భారం పడుతోందని అంటున్నారు.

“విద్యుత్ బిల్లుల భారం మాత్రం ప్రజలపై.. నిర్లక్ష్యం మాత్రం అధికారులది” అంటూ స్థానికులు మండిపడుతున్నారు. ఎన్ని సార్లు అధికారులకు ఫిర్యాదు చేసినా ఫలితం లేకపోవడంతో ప్రజల్లో అసహనం రోజురోజుకూ పెరుగుతోంది. ఇప్పటికైనా సంబంధిత అధికారులు స్పందించి పగటిపూట వెలుగుతున్న వీధి దీపాలను వెంటనే నిలిపివేసి విద్యుత్ వృథాను అరికట్టాలని, లేకపోతే ప్రజా వ్యతిరేకత తప్పదని గ్రామస్తులు హెచ్చరిస్తున్నారు.