చేవెళ్ల ఫామ్‌హౌస్‌లో అర్ధరాత్రి పార్టీపై పోలీసుల దాడి
108 మంది విద్యార్థులు పట్టుబాటు.. 15 గ్రాముల గంజాయి, మద్యం స్వాధీనం
7 కార్లు, 3 బైక్‌లు, 70 సెల్‌ఫోన్లు సీజ్‌
పార్టీ నిర్వాహకుడితో సహా ముగ్గురికి డ్రగ్స్ పరీక్షల్లో పాజిటివ్
రంగారెడ్డి జిల్లా, చేవెళ్ల (ఎన్ టుడే న్యూస్):
రంగారెడ్డి జిల్లా చేవెళ్ల మండలం కమ్మెట గ్రామంలోని ఎల్‌జీ ఫామ్‌హౌస్‌లో నిర్వహిస్తున్న పార్టీపై స్పెషల్ ఆపరేషన్స్ టీమ్ (ఎస్‌ఓటీ), చేవెళ్ల పోలీసులు సంయుక్తంగా దాడులు నిర్వహించారు. ఈ తనిఖీల్లో ఐసీఎఫ్‌ఏఐ/ఐబీఎస్ కళాశాలలకు చెందిన 108 మంది విద్యార్థులు పోలీసులకు పట్టుబడ్డారు. వీరిలో 71 మంది యువకులు, 37 మంది యువతులు ఉన్నట్లు సమాచారం.
పోలీసులు నిర్వహించిన తనిఖీల్లో 15 గ్రాముల గంజాయి, మద్యం స్వాధీనం చేసుకున్నట్లు సమాచారం. అలాగే ఫామ్‌హౌస్‌కు వచ్చిన వారి వద్ద ఉన్న 7 కార్లు, 3 బైక్‌లు, 70 సెల్‌ఫోన్లను పోలీసులు స్వాధీనం చేసుకున్నట్లు తెలుస్తోంది. ఈ ఘటనతో చేవెళ్ల ప్రాంతంలో కలకలం నెలకొంది.
ప్రాథమిక సమాచారం ప్రకారం ఈ పార్టీని మన్నన్ అనే వ్యక్తి నిర్వహించినట్లు తెలుస్తోంది. పార్టీకి హాజరైన ఒక్కొక్కరి నుంచి రూ.1,000 నుంచి రూ.2,000 వరకు వసూలు చేసినట్లు సమాచారం. పార్టీ నిర్వహించే ప్రదేశం వివరాలను కూడా చివరి నిమిషంలోనే పాల్గొనేవారికి పంపించినట్లు తెలిసింది.
పార్టీ నిర్వాహకుడితో పాటు మరో ఇద్దరికి నిర్వహించిన గంజాయి పరీక్షల్లో పాజిటివ్ వచ్చినట్లు సమాచారం. ఈ పరీక్షల ఫలితాలు, తదుపరి చట్టపరమైన చర్యలకు సంబంధించిన వివరాలు తెలియాల్సి ఉంది. పార్టీకి మాదకద్రవ్యాలు ఎక్కడి నుంచి వచ్చాయి? వాటి సరఫరా వెనుక ఎవరున్నారు? అనే కోణాల్లో పోలీసులు విచారణ కొనసాగిస్తున్నట్లు తెలుస్తోంది.
ఫామ్‌హౌస్‌లో పార్టీ నిర్వహణకు అవసరమైన అనుమతులు ఉన్నాయా? నిబంధనలకు విరుద్ధంగా కార్యక్రమం నిర్వహించారా? అనే అంశాలపై పోలీసులు దర్యాప్తు చేస్తున్నారు. ఈ వ్యవహారంలో ఇతరుల ప్రమేయం ఉందా అనే విషయాన్ని కూడా పరిశీలిస్తున్నారు.
పోలీసుల విచారణ పూర్తయితే పార్టీ నిర్వహణ, మాదకద్రవ్యాల వినియోగం, సరఫరాకు సంబంధించిన మరిన్ని వివరాలు వెలుగులోకి వచ్చే అవకాశం ఉంది.
