టీటీడీ తరహాలో యాదాద్రి బోర్డు.. చైర్మన్గా మన్నె సత్యనారాయణ రెడ్డి.. సురేఖకు చోటు
హైదరాబాద్, జూలై 1: తెలంగాణ ప్రభుత్వం ప్రముఖ పుణ్యక్షేత్రం యాదగిరిగుట్ట శ్రీ లక్ష్మీనరసింహస్వామి దేవస్థానం అభివృద్ధికి కీలక నిర్ణయం తీసుకుంది. తిరుమల తిరుపతి దేవస్థానం తరహాలో యాదాద్రి ఆలయాన్ని అభివృద్ధి చేయాలనే లక్ష్యంతో 18 మంది సభ్యులతో కూడిన నూతన పాలక మండలిని ఏర్పాటు చేసింది.
ఈ పాలక మండలికి ప్రముఖ ఔషధ రంగ పారిశ్రామికవేత్త, మన్నె సత్యనారాయణ రెడ్డిను చైర్మన్గా నియమించింది. బోర్డులో ప్రముఖ సినీ నటుడు చిరంజీవి సతీమణి సురేఖ కొణిదెలకు చోటు కల్పించడం ప్రత్యేక ఆకర్షణగా మారింది. అలాగే గడ్డం వినోద్ వెంకటస్వామికు కూడా బోర్డులో స్థానం దక్కింది.
చైర్మన్గా నియమితులైన మన్నె సత్యనారాయణ రెడ్డి ఉస్మానియా, పాలమూరు విశ్వవిద్యాలయాల నుంచి రెండు పీహెచ్డీలు పొందారు. వ్యాపార రంగంలో విశేష విజయాలు సాధించి, తమ సంస్థను అంతర్జాతీయ స్థాయికి తీసుకెళ్లిన పారిశ్రామికవేత్తగా గుర్తింపు పొందారు. ఆయన మాజీ ఎంపీ మన్నె శ్రీనివాస్ రెడ్డికు సోదరుడు.
పాలక మండలిలో చిల్లప్పగారి విజయరాజం, తూళ్ల విజయేందర్, పోచబోయిన ఈశ్వరమ్మ యాదవ్, స్వాతి కాంతిమణి, గుండు మల్లయ్య, ఎం. రాఘవేంద్రరావు, డాక్టర్ లక్ష్మీనారాయణ నాయక్ తదితరులు సభ్యులుగా ఉన్నారు. ప్రభుత్వ ప్రధాన కార్యదర్శి, దేవాదాయ శాఖ ముఖ్య కార్యదర్శి, కమిషనర్, యాదాద్రి జిల్లా కలెక్టర్, వైటీడీఏ వైస్ చైర్మన్, ఆలయ ఈవో, స్థానాచార్యులు ఎక్స్అఫీషియో సభ్యులుగా వ్యవహరించనున్నారు.
ఫౌండర్స్ ట్రస్టీలు, ఎక్స్అఫీషియో సభ్యులు మినహా మిగతా సభ్యుల పదవీకాలం రెండేళ్లపాటు ఉంటుంది. దీనికి సంబంధించిన ఉత్తర్వులను దేవాదాయ శాఖ ముఖ్య కార్యదర్శి శైలజా రామయ్యర్ జారీ చేశారు.
యాదాద్రి బోర్డులో గతంలో ఎన్నడూ లేని విధంగా సురేఖకు స్థానం కల్పించడంతో మెగా అభిమానులు హర్షం వ్యక్తం చేస్తున్నారు.
