హైకోర్టు ఆదేశాలపై చర్యలు తీసుకోలేదని పిటిషనర్ ఆరోపణ

తెలంగాణ విద్యాశాఖ కార్యదర్శి యోగితా రాణాకు కోర్టు ధిక్కరణ నోటీసులు

హైదరాబాద్ | Ntoday News

తెలంగాణ విద్యాశాఖ కార్యదర్శి యోగితా రాణాకు హైకోర్టు కోర్టు ధిక్కరణ నోటీసులు జారీ చేసింది. హైదరాబాద్ పబ్లిక్ స్కూల్ సొసైటీ నిధుల వ్యవహారంలో అక్రమాలు జరుగుతున్నాయని, ప్రభుత్వ అనుమతులు లేకుండా నిర్మాణాలు చేపడుతున్నారని ఆరోపిస్తూ దుర్గం రవీందర్ గతంలో తెలంగాణ హైకోర్టులో ప్రజా ప్రయోజన వ్యాజ్యం (PIL) దాఖలు చేశారు.

ఈ పిటిషన్‌పై విచారణ చేపట్టిన హైకోర్టు.. సంబంధిత అంశాలపై విచారణ జరిపి మూడు నెలల్లో తగిన చర్యలు తీసుకోవాలని గతేడాది అక్టోబర్‌లో విద్యాశాఖ కార్యదర్శిని ఆదేశించినట్లు పిటిషనర్ పేర్కొన్నారు.

అయితే కోర్టు ఆదేశాలు జారీ చేసి ఏడాది గడుస్తున్నా ఎలాంటి చర్యలు తీసుకోలేదని ఆరోపిస్తూ దుర్గం రవీందర్ హైకోర్టులో కోర్టు ధిక్కరణ పిటిషన్ దాఖలు చేశారు.

ఈ పిటిషన్‌పై విచారణ చేపట్టిన తెలంగాణ హైకోర్టు చీఫ్ జస్టిస్ అపరేష్ కుమార్ సింగ్ ధర్మాసనం, కోర్టు ఆదేశాల అమలుపై వివరణ ఇవ్వాలని విద్యాశాఖ కార్యదర్శి యోగితా రాణాకు కోర్టు ధిక్కరణ నోటీసులు జారీ చేసినట్లు సమాచారం.

ఈ వ్యవహారంపై తదుపరి విచారణలో అధికారులు తమ వైఖరిని, కోర్టు ఆదేశాల అమలుకు తీసుకున్న చర్యలను వివరించాల్సి ఉంటుంది.

గమనిక: హైదరాబాద్ పబ్లిక్ స్కూల్ సొసైటీకి సంబంధించిన అక్రమాల ఆరోపణలు పిటిషన్‌లో చేసిన ఆరోపణలు మాత్రమే; అవి న్యాయస్థానం తుది నిర్ణయంగా భావించరాదు.