తెలుగు రాష్ట్రాలకు వాతావరణ శాఖ శుభవార్త

తెలుగు రాష్ట్రాల ప్రజలకు భారత వాతావరణ శాఖ (IMD) ఊరటనిచ్చే సమాచారం వెల్లడించింది. 2026 నైరుతి రుతుపవనాల సీజన్‌లో తెలంగాణ, ఆంధ్రప్రదేశ్‌లోని కొన్ని ప్రాంతాల్లో సాధారణం నుంచి సాధారణం కంటే ఎక్కువ వర్షపాతం నమోదయ్యే అవకాశం ఉందని అంచనా వేసింది. ముఖ్యంగా మధ్య తెలంగాణ ప్రాంతాలు, హైదరాబాద్ పరిసరాల్లో అధిక వర్షాలు కురిసే సూచనలు ఉన్నట్లు పేర్కొంది. అలాగే ఆంధ్రప్రదేశ్ మధ్య కోస్తా ప్రాంతాల్లో కూడా రుతుపవనాల ప్రభావం అనుకూలంగా ఉండనున్నట్లు తెలిపింది. 

ఈ వర్షాలు వ్యవసాయ రంగానికి, తాగునీటి అవసరాలకు, భూగర్భ జలాల పునరుద్ధరణకు ఉపయోగపడతాయని నిపుణులు భావిస్తున్నారు.

దేశవ్యాప్తంగా మాత్రం ఆందోళన

అయితే దేశవ్యాప్తంగా పరిస్థితి అంత అనుకూలంగా లేదని ఐఎండీ తాజా అంచనాలు సూచిస్తున్నాయి. 2026 నైరుతి రుతుపవనాల కాలంలో దేశవ్యాప్తంగా సగటు వర్షపాతం దీర్ఘకాల సగటు (LPA)లో సుమారు 90 శాతం మాత్రమే నమోదయ్యే అవకాశం ఉందని, ఇది సాధారణం కంటే తక్కువ వర్షపాతంగా పరిగణించబడుతుందని తెలిపింది.

ఎల్‌నినో ప్రభావం

పసిఫిక్ మహాసముద్రంలో అభివృద్ధి చెందుతున్న ఎల్‌నినో పరిస్థితులు భారత రుతుపవనాలపై ప్రతికూల ప్రభావం చూపే అవకాశం ఉందని ఐఎండీ హెచ్చరించింది. దీంతో దేశంలోని పలు ప్రాంతాల్లో తక్కువ వర్షాలు, అధిక ఉష్ణోగ్రతలు నమోదయ్యే అవకాశాలు ఉన్నాయని పేర్కొంది. 

అందువల్ల నీటి వనరుల వినియోగంలో జాగ్రత్తలు పాటించాలని, వర్షపు నీటి సంరక్షణకు ప్రాధాన్యం ఇవ్వాలని వాతావరణ నిపుణులు సూచిస్తున్నారు.