ఉక్రెయిన్ క్షిపణి దాడిలో కేరళకు చెందిన భారత నావికుడు మృతి
ఉక్రెయిన్ క్షిపణి దాడిలో కేరళకు చెందిన భారత నావికుడు మృతి
ఉక్రెయిన్‌లోని ఒడెస్సా తీర ప్రాంతంలో రష్యా దళాలు జరిపిన క్షిపణి దాడిలో కేరళకు చెందిన యువ నావికుడు అఖిల్ జోయన్ (26) మృతి చెందారు. గినియా-బిస్సావు జెండాతో ప్రయాణిస్తున్న ఎమ్‌వి గోల్డెన్ లియో కార్గో నౌకపై జరిగిన ఈ దాడిలో మొత్తం 10 మంది సిబ్బంది ప్రాణాలు కోల్పోగా, వారిలో నలుగురు భారతీయులు ఉన్నట్లు సమాచారం.
కాసర్‌గోడ్ జిల్లా వెల్లరిక్కుండుకు చెందిన అఖిల్ గత ఆరేళ్లుగా మర్చంట్ నేవీలో విధులు నిర్వహిస్తున్నారు. కుటుంబానికి ఏకైక సంతానమైన ఆయన సంపాదనే కుటుంబానికి ప్రధాన ఆధారం. మరో రెండు నెలల్లో ఆలప్పుళకు చెందిన యువతితో ఆయన వివాహం జరగాల్సి ఉండగా ఈ విషాదం చోటుచేసుకుంది.
మూడు నెలల క్రితం నిశ్చితార్థం కోసం స్వగ్రామానికి వచ్చిన అఖిల్, నెల రోజుల క్రితమే తిరిగి విధుల్లో చేరారు. స్థానికంగా టగ్-ఆఫ్-వార్ క్రీడాకారుడిగా కూడా మంచి గుర్తింపు పొందారు.
అఖిల్ పనిచేస్తున్న షిప్పింగ్ సంస్థ నుంచి వచ్చిన ఇమెయిల్ ద్వారా ఆయన మరణవార్త కుటుంబ సభ్యులకు చేరింది. దీంతో తల్లిదండ్రులు తీవ్ర విషాదంలో మునిగిపోయారు. భౌతికకాయాన్ని స్వదేశానికి తీసుకురావడానికి కుటుంబ సభ్యులు, స్థానిక ప్రజాప్రతినిధులు చర్యలు చేపట్టారు.
ఈ ఘటనపై కేరళ ప్రభుత్వం స్పందించింది. భారత విదేశాంగ మంత్రిత్వ శాఖ, రష్యా కాన్సులేట్‌తో సమన్వయం చేసి పూర్తి వివరాలు సేకరించాలని, మృతదేహాన్ని స్వదేశానికి రప్పించేందుకు అవసరమైన చర్యలు తీసుకోవాలని నోర్కా విభాగాన్ని ముఖ్యమంత్రి కార్యాలయం ఆదేశించింది.
ఉక్రెయిన్ సీ పోర్ట్స్ అథారిటీ సమాచారం ప్రకారం, ఉక్రెయిన్ ధాన్యాన్ని లోడ్ చేసుకుని ఒడెస్సా పోర్టు నుంచి బయలుదేరిన కొద్దిసేపటికే ఈ కార్గో నౌకపై క్షిపణి దాడి జరిగింది. ప్రమాదంలో నౌకలోని 10 మంది సిబ్బంది మృతి చెందగా, మరో ఎనిమిది మందిని ఉక్రెయిన్ రక్షణ బృందాలు సురక్షితంగా బయటకు తీసుకొచ్చాయి.
