వర్షాల కోసం గాడిదలకు ఘన వివాహం.. గ్రామస్తుల వినూత్న ప్రయత్నం

వర్షాలు కురవక పంటలు ఎండిపోతుండటంతో కర్ణాటక రాష్ట్రంలోని మూడలగి తాలూకా మున్యాళ గ్రామ ప్రజలు వినూత్నంగా గాడిదలకు వివాహం జరిపించారు.

మగ గాడిదకు "కాంతేశ్", ఆడ గాడిదకు "కస్తూరి" అని నామకరణం చేసి, గ్రామ సంప్రదాయాలకు అనుగుణంగా శాస్తోక్తంగా పెళ్లి వేడుక నిర్వహించారు. పెళ్లికి గ్రామస్థులు పెద్ద సంఖ్యలో హాజరై సందడి చేశారు. నూతన దంపతులను ఆశీర్వదించిన అనంతరం అతిథులకు ప్రత్యేక విందు భోజనాలు కూడా ఏర్పాటు చేశారు.

గ్రామ పెద్దలు మాట్లాడుతూ.. ఈ ఏడాది సరైన వర్షాలు లేక పంటలు ఎండిపోతున్నాయని, రైతులు తీవ్ర ఆందోళనలో ఉన్నారని తెలిపారు. వర్ష దేవుడు కరుణించి మంచి వర్షాలు కురిపించాలని కోరుతూ ఆనాదిగా వస్తున్న ఆచారం ప్రకారం గాడిదలకు వివాహం జరిపించినట్లు చెప్పారు.

ఈ వినూత్న వివాహం ప్రస్తుతం స్థానికంగా చర్చనీయాంశంగా మారింది.