వరుస దొంగతనాలు ఛేదించిన తాడేపల్లిగూడెం పోలీసులు

 పగో జిల్లా | తాడేపల్లిగూడెం

ఇద్దరు అంతర్రాష్ట్ర దొంగలు అరెస్ట్ – రూ.3.25 లక్షల విలువైన బంగారం, వెండి స్వాధీనం

తాడేపల్లిగూడెం పట్టణంలో ఇటీవల చోటుచేసుకున్న వరుస చైన్ స్నాచింగ్‌లు, గృహ దొంగతనాల కేసులను పోలీసులు ఛేదించారు. ఈ కేసుల్లో పాల్గొన్న ఇద్దరు అంతర్రాష్ట్ర దొంగలను అరెస్ట్ చేసి, వారి వద్ద నుంచి బంగారం, వెండి ఆభరణాలను స్వాధీనం చేసుకున్నారు.

పోలీసుల వివరాలు

ఒంటరిగా వెళ్తున్న వృద్ధ మహిళల మెడలోని మంగళసూత్రాలను తెంచుకోవడం, తాళం వేసి ఉన్న ఇళ్లలోకి చొరబడి దొంగతనాలకు పాల్పడిన ఘటనల్లో పులపాకుల తులసి (28), కామాక్షి దుర్గాప్రసాద్ (28) నిందితులుగా గుర్తించారు.

గురువారం ఉదయం తాడేపల్లిగూడెం శివాలయం బ్రిడ్జి వద్ద పోలీసులు వీరిని అదుపులోకి తీసుకున్నారు.

నిందితుల వద్ద నుంచి సుమారు

20 గ్రాముల బంగారు మంగళసూత్రం

425 గ్రాములకు పైగా వెండి వస్తువులు

1 గ్రాము బంగారు చెవిపోగులు

స్వాధీనం చేసుకున్నట్లు పోలీసులు తెలిపారు. మొత్తం విలువ సుమారు రూ.3.25 లక్షలుగా అంచనా.

పోలీసుల చర్యలు

జిల్లా ఎస్పీ అద్నాన్ నయీం అస్మి ఆదేశాల మేరకు, డీఎస్పీ డి. విశ్వనాథ్ పర్యవేక్షణలో సీఐ ఆది ప్రసాద్ నేతృత్వంలో ప్రత్యేక బృందాలు ఏర్పాటు చేసి నిందితులను పట్టుకున్నారు. ఎస్సైలు బి. శ్రీనివాస్, కె.వి. రమణతో పాటు సిబ్బంది నిఘా నిర్వహించారు.

నిందితులను రిమాండ్‌కు తరలించినట్లు పోలీసులు తెలిపారు.

ప్రజలకు సూచన

అపరిచిత వ్యక్తులపై అప్రమత్తంగా ఉండాలని, అనుమానాస్పద పరిస్థితులు కనిపిస్తే వెంటనే పోలీసులకు సమాచారం ఇవ్వాలని అధికారులు సూచించారు.