యాదాద్రి భువనగిరి జిల్లాలో దారుణం.. ఇందిరమ్మ ఇల్లు ఇప్పిస్తానంటూ మానసిక దివ్యాంగురాలిపై లైంగిక దాడి

కాంగ్రెస్ గ్రామశాఖ అధ్యక్షుడిపై కేసు నమోదు.. బాధిత కుటుంబాన్ని బెదిరించినట్లు ఆరోపణలు

యాదాద్రి భువనగిరి జిల్లా: ఇందిరమ్మ ఇల్లు ఇప్పిస్తానని నమ్మించి ఓ మానసిక దివ్యాంగురాలిపై లైంగిక దాడికి పాల్పడిన ఘటన కలకలం రేపింది. ఆత్మకూరు మండలంలోని ఓ గ్రామంలో ఈ ఘటన చోటుచేసుకుంది.

బాధితురాలి కుటుంబానికి ఇందిరమ్మ ఇల్లు మంజూరు చేయిస్తానని మాయమాటలు చెప్పిన గ్రామ కాంగ్రెస్ శాఖ అధ్యక్షుడు శంకర్ రెడ్డి, ఆమెపై లైంగిక దాడికి పాల్పడినట్లు ఆరోపణలు వచ్చాయి. జరిగిన విషయాన్ని బాధితురాలు తన భర్తకు చెప్పడంతో ఆయన గ్రామ పెద్దల సమక్షంలో పంచాయతీ నిర్వహించినట్లు సమాచారం.

అయితే ఈ విషయంపై శంకర్ రెడ్డి బాధిత కుటుంబాన్ని బెదిరిస్తూ, అవమానాలకు గురిచేశాడని బాధితులు ఆరోపించారు. తన భార్యపై లైంగిక దాడికి పాల్పడిన వ్యక్తిపై చర్యలు తీసుకోవాలని బాధితురాలి భర్త పోలీసులకు ఫిర్యాదు చేశారు.

ఫిర్యాదు ఆధారంగా పోలీసులు కేసు నమోదు చేసి దర్యాప్తు ప్రారంభించారు. ఘటనకు సంబంధించిన పూర్తి వివరాలు పోలీసుల విచారణలో వెల్లడికానున్నాయి.