యాప్‌లు కాదు.. యూరియా కావాలి.. సీఎం సవాల్‌కు సిద్ధం: కేటీఆర్

ముఖ్యమంత్రి చేసిన సవాల్‌కు తాను సిద్ధంగా ఉన్నానని బీఆర్ఎస్ వర్కింగ్ ప్రెసిడెంట్ కేటీఆర్ ప్రకటించారు. తమ పార్టీ తరఫున తానే చర్చకు వస్తానని చెప్పారు.

అశోక్‌నగర్‌లో ఉద్యోగాల అంశంపైనా, వరంగల్ రైతు డిక్లరేషన్‌పైనా చర్చకు సిద్ధమని పేర్కొన్న కేటీఆర్.. టాపిక్, తేదీ, స్థలం, సమయాన్ని ముఖ్యమంత్రి రేవంత్ రెడ్డి నిర్ణయించుకోవచ్చన్నారు.

ప్రభుత్వం వెల్లడిస్తున్న గణాంకాలను నిరూపించలేకపోతే తాను రాజకీయాల నుంచి శాశ్వతంగా తప్పుకుంటానని సవాల్ విసిరారు. సవాల్ చేసి వెనక్కి తగ్గడం రేవంత్ రెడ్డికి అలవాటని విమర్శించారు.

ప్రభుత్వం సభలు పెట్టి ప్రజలను తప్పుదోవ పట్టించే వ్యాఖ్యలు చేస్తోందని ఆరోపించిన కేటీఆర్.. రైతులకు యాప్‌లు కాదు, యూరియా ఎరువులు కావాలని వారు కోరుతున్నారని అన్నారు.