5 నెలలుగా జీతాలు లేవు.. వేతనాల కోసం ఔట్‌సోర్సింగ్ ఉద్యోగుల మహాధర్నా

హైదరాబాద్‌లోని ఉస్మానియా ఆసుపత్రిలో పనిచేస్తున్న తెలంగాణ మెడికల్ అండ్ హెల్త్ ఔట్‌సోర్సింగ్, కాంట్రాక్ట్ ఉద్యోగులు వేతనాల కోసం మహాధర్నా నిర్వహించారు. గత ఐదు నెలలుగా జీతాలు అందక తీవ్ర ఆర్థిక ఇబ్బందులు ఎదుర్కొంటున్నామని ఉద్యోగులు ఆవేదన వ్యక్తం చేశారు.

ఆర్థిక పరిస్థితి అత్యంత దయనీయంగా ఉన్నప్పటికీ ప్రతిరోజూ విధులకు హాజరవుతూ ప్రజలకు సేవలు అందిస్తున్నామని తెలిపారు. కుటుంబాలను పోషించడం, ఇళ్ల అద్దెలు చెల్లించడం, పిల్లల చదువుల ఖర్చులు భరించడం కష్టంగా మారిందని వాపోయారు.

తాము చేసిన పనికి తగిన విధంగా ప్రతి నెలా సమయానికి వేతనాలు చెల్లించాలని, పెండింగ్‌లో ఉన్న ఐదు నెలల జీతాలను వెంటనే విడుదల చేయాలని ఉద్యోగులు ప్రభుత్వాన్ని డిమాండ్ చేశారు. తమ సమస్యలను పరిష్కరించకపోతే ఆందోళనలను మరింత ఉద్ధృతం చేస్తామని హెచ్చరించారు.