అవినీతి అధికారి.. రూ.6 వేల జీతంతో మొదలై కోటీశ్వరుడిగా!
ఒడిశాలో ఓ ప్రభుత్వ ఇంజినీర్ అక్రమాస్తుల కేసులో విజిలెన్స్ అధికారులకు చిక్కాడు. నెలకు కేవలం ₹6 వేల జీతంతో ఉద్యోగ జీవితాన్ని ప్రారంభించిన ITDA అసిస్టెంట్ ఎగ్జిక్యూటివ్ ఇంజినీర్ (AEE) బైకుంఠనాథ్ బెహెరా ప్రస్తుతం కోట్ల రూపాయల ఆస్తులను కూడబెట్టినట్లు ఆరోపణలు ఎదుర్కొంటున్నాడు.
అక్రమాస్తులపై వచ్చిన ఫిర్యాదుల నేపథ్యంలో విజిలెన్స్ అధికారులు విస్తృతంగా సోదాలు నిర్వహించారు. ఈ దాడుల్లో బ్యాంకు లాకర్లలో సుమారు ₹2 కోట్ల విలువైన ₹500 నోట్ల కట్టలు లభించినట్లు సమాచారం.
అంతేకాకుండా వివిధ ప్రాంతాల్లో 5 భవనాలు, 13 ప్లాట్లు ఉన్నట్లు అధికారులు గుర్తించారు. బంగారం, నగదు, ఇతర పెట్టుబడులు మరియు ఆస్తుల విలువపై ఇంకా లెక్కింపు కొనసాగుతోంది.
అధికారిక ఆదాయానికి మించి భారీ స్థాయిలో ఆస్తులు కూడబెట్టినట్లు ప్రాథమికంగా తేలడంతో కేసు దర్యాప్తు మరింత వేగవంతం చేశారు. ఈ ఘటన రాష్ట్రంలో సంచలనంగా మారింది.
