చిన్నారుల భవిష్యత్తుకు అంగన్వాడీ బంగారు బాట
చిన్నారుల భవిష్యత్తుకు ‘అంగన్వాడీ’ బంగారు బాట
ఘనంగా ‘అమ్మ మాట - అంగన్వాడీ బాట’ కార్యక్రమం
మెనూ ప్రకారం పౌష్టికాహారం, ఆరోగ్యంపై ప్రత్యేక దృష్టి: జిల్లా సంక్షేమ అధికారి రౌఫ్ ఖాన్
అంగన్వాడీ కేంద్రాల వైపు చిన్నారులు వేసే ప్రతి అడుగు వారి బంగారు భవిష్యత్తుకు బలమైన పునాది అని మంచిర్యాల జిల్లా సంక్షేమ అధికారి రౌఫ్ ఖాన్ అన్నారు. శనివారం మంచిర్యాల పట్టణంలోని రామ్నగర్ సెక్టార్లో "అమ్మ మాట - అంగన్వాడీ బాట" కార్యక్రమాన్ని ఘనంగా నిర్వహించారు. ఈ కార్యక్రమానికి సి.డి.పి.ఓ విష్ణు ప్రియ, సూపర్వైజర్ జ్యోతి, అంగన్వాడీ టీచర్లతో కలిసి ఆయన ముఖ్య అతిథిగా హాజరయ్యారు. చిన్నారులను అంగన్వాడీ కేంద్రాలకు పంపించి, వారి ఉజ్వల భవిష్యత్తుకు తల్లిదండ్రులు సహకరించాలని ఈ సందర్భంగా ఆయన పిలుపునిచ్చారు.
ప్రజా పాలన ప్రగతి ప్రణాళిక 99 రోజుల కార్యాచరణలో భాగంగా జిల్లా సంక్షేమ శాఖ ఆధ్వర్యంలో ఈ "అమ్మ మాట - అంగన్వాడీ బాట" కార్యక్రమాన్ని ప్రతిష్టాత్మకంగా నిర్వహిస్తున్నట్లు జిల్లా సంక్షేమ అధికారి రౌఫ్ ఖాన్ తెలిపారు. అంగన్వాడీ కేంద్రాలలో చిన్నారుల సంక్షేమమే ధ్యేయంగా ప్రభుత్వం పనిచేస్తోందని పేర్కొన్నారు. కేంద్రాలకు వచ్చే పిల్లలకు రోజువారీ మెనూ ప్రకారం పౌష్టికాహారాన్ని అందించడంతో పాటు, సమయానుసారంగా వారి ఎత్తు, బరువులను నమోదు చేస్తూ శారీరక, మానసిక ఎదుగుదలను నిరంతరం పర్యవేక్షిస్తున్నట్లు ఆయన వివరించారు.
‘పోషణ్ అభియాన్’ పథకంలో భాగంగా చిన్నారుల ఆరోగ్యం, శారీరక దృఢత్వంపై ప్రత్యేక దృష్టి సారించినట్లు రౌఫ్ ఖాన్ స్పష్టం చేశారు. నాణ్యమైన విద్య, మెరుగైన ఆరోగ్యం, సరైన పోషణ ద్వారానే పిల్లల భవిష్యత్తు ప్రగతి పథంలో సాగుతుందని, ఇందుకోసం శాఖా పరంగా అన్ని చర్యలు తీసుకుంటున్నామని చెప్పారు. ఈ కార్యక్రమంలో అంగన్వాడీ టీచర్లు, సిబ్బందితో పాటు పెద్ద సంఖ్యలో చిన్నారుల తల్లిదండ్రులు పాల్గొని కార్యక్రమాన్ని విజయవంతం చేశారు.
