Delhi EV Policy: రూ.30 లక్షల లోపు ఎలక్ట్రిక్ కార్లకు రోడ్ టాక్స్ పూర్తి మినహాయింపు
న్యూఢిల్లీ | NTODAY NEWS
ఎలక్ట్రిక్ వాహనాల వినియోగాన్ని మరింత ప్రోత్సహించే లక్ష్యంతో ఢిల్లీ ప్రభుత్వం నూతన ఎలక్ట్రిక్ వెహికల్ (EV) పాలసీకి ఆమోదం తెలిపింది. రాజధానిలో కాలుష్యాన్ని తగ్గించడం, పర్యావరణహిత రవాణాను ప్రోత్సహించడం ఈ విధానం ప్రధాన లక్ష్యమని ప్రభుత్వం వెల్లడించింది.
కొత్త పాలసీ ప్రకారం రూ.30 లక్షల లోపు ధర కలిగిన ఎలక్ట్రిక్ కార్ల రిజిస్ట్రేషన్కు ప్రత్యేక ప్రోత్సాహకాలు అందించనున్నారు. అలాగే ఈ వాహనాలపై విధించే రోడ్ టాక్స్ను పూర్తిగా మినహాయిస్తూ 100 శాతం రాయితీ ఇవ్వాలని ప్రభుత్వం నిర్ణయించింది.
ఈ నిర్ణయంతో ఎలక్ట్రిక్ కార్ల కొనుగోలుపై ప్రజల్లో మరింత ఆసక్తి పెరిగే అవకాశం ఉందని అధికారులు భావిస్తున్నారు. ఢిల్లీలో ఈవీ వాహనాల సంఖ్య పెరగడంతో పాటు, కాలుష్య నియంత్రణకు కూడా ఈ పాలసీ దోహదపడనుంది.
పర్యావరణ పరిరక్షణ, ఇంధన వినియోగం తగ్గింపు, స్వచ్ఛమైన రవాణా వ్యవస్థ అభివృద్ధి లక్ష్యంగా ఢిల్లీ ప్రభుత్వం తీసుకున్న ఈ నిర్ణయం ఎలక్ట్రిక్ వాహనాల రంగానికి కీలక ముందడుగుగా నిలవనుంది.
