ఎలిమినేడు ఫార్మా కంపెనీలో రియాక్టర్ పేలుడు

ఎలిమినేడు ఫార్మా కంపెనీలో రియాక్టర్ పేలుడు, NTODAY NEWS చిట్యాల 

తొమ్మిది మందికి గాయాలు అని ప్రాథమిక సమాచారం

​నల్గొండ: జిల్లాలోని చిట్యాల మండలంలో భారీ పేలుడు సంభవించింది. పిట్టాంపల్లి గ్రామం శివారులో ఉన్న 'నోష్ ఫార్మా కాంపెనీ' (NOSCH Lab ) ఫార్మా కంపెనీలో  ఒక్కసారిగా రియాక్టర్ పేలిపోవడంతో తీవ్ర కలకలం రేగింది. కంపెనీలోని 3వ బ్లాక్‌లో కార్మికులు విధుల్లో ఉండగా ప్రమాదవశాత్తు రియాక్టర్ పేలింది. ఈ పేలుడు ధాటికి ఆ ప్రాంతమంతా దట్టమైన పొగలు అలుముకున్నాయి. ఈ ప్రమాదంలో తొమ్మిది మంది కార్మికులు తీవ్రంగా గాయపడ్డారు. గాయపడిన వారిని వెంటనే చికిత్స నిమిత్తం సమీప ఆసుపత్రికి తరలించారు. వీరిలో ఒకరి పరిస్థితి అత్యంత విషమంగా ఉన్నట్లు సమాచారం. ​సమాచారం అందుకున్న వెంటనే అగ్నిమాపక సిబ్బంది ఘటనా స్థలానికి చేరుకున్నారు. ​ప్రస్తుతం ఫైర్ ఇంజన్ల సహాయంతో మంటలను అదుపులోకి తెచ్చే ప్రయత్నం చేస్తున్నారు. ​పేలుడు ధాటికి ఫ్యాక్టరీ పరిసరాల్లోని ప్రజలు భయాందోళనకు గురయ్యారు. ఫార్మా కంపెనీల్లో భద్రతా ప్రమాణాల లోపంపై స్థానికులు ఆగ్రహం వ్యక్తం చేస్తున్నారు. ఈ ప్రమాదానికి గల పూర్తి కారణాలు ఇంకా తెలియాల్సి ఉంది.