కార్గిల్ వీరులకు ఘన నివాళి...
కార్గిల్ వీరులకు ఘన నివాళి.. మంచిర్యాలలో జాతీయ జెండాను ఆవిష్కరించిన ఎమ్మెల్యే ప్రేమ్ సాగర్ రావు
కార్గిల్ విజయ్ దివస్ సందర్భంగా మంచిర్యాల నియోజకవర్గంలో భారత సైనికుల త్యాగాలను స్మరించుకుంటూ ఘనంగా నివాళులు అర్పించారు. మంచిర్యాల మున్సిపల్ కార్పొరేషన్ పరిధిలోని బెల్లంపల్లి చౌరస్తా వద్ద నిర్వహించిన కార్యక్రమంలో మంచిర్యాల శాసనసభ్యులు శ్రీ కొక్కిరాల ప్రేమ్ సాగర్ రావు ముఖ్య అతిథిగా పాల్గొని జాతీయ జెండాను ఆవిష్కరించారు.
ఈ సందర్భంగా ఎమ్మెల్యే ప్రేమ్ సాగర్ రావు మాట్లాడుతూ.. దేశ రక్షణ కోసం కార్గిల్ యుద్ధంలో ప్రాణాలర్పించిన వీర జవాన్ల శౌర్యం, త్యాగం చిరస్మరణీయమని కొనియాడారు. మాతృభూమి పట్ల సైనికులకు ఉన్న అచంచలమైన నిబద్ధతను, వారి అసమాన ధైర్యసాహసాలను గుర్తుచేసుకుంటూ కార్గిల్ వీరులకు ఆయన ఘనంగా జోహార్లు అర్పించారు.
ఈ కార్యక్రమంలో మంచిర్యాల మున్సిపల్ కార్పొరేషన్ మేయర్ ధర్ని మధుకర్, స్థానిక కార్పొరేటర్లు, కో-ఆప్షన్ సభ్యులు, నాయకులు, మాజీ సైనికోద్యోగులు (Ex-Army), తదితరులు పాల్గొన్నారు. దేశభక్తి నినాదాలతో ఈ కార్యక్రమం ఆద్యంతం ఉత్సాహంగా సాగింది.
