కోటపాడు గ్రామంలో సీసీ రోడ్డు నిర్మాణం

కోటపాడు గ్రామంలో సీసీ రోడ్డు నిర్మాణం – నెరవేరుతున్న చిరకాల కోరిక

ఏలూరు జిల్లా నూజివీడు నియోజకవర్గం చాట్రాయి మండలం కోటపాడు గ్రామంలో సీసీ రోడ్డు నిర్మాణ పనులు వేగంగా కొనసాగుతున్నాయి. గ్రామ ప్రజలు ఎన్నో సంవత్సరాలుగా ఎదురుచూస్తున్న ఈ రహదారి నిర్మాణం ఇప్పుడు కార్యరూపం దాల్చడంతో ఆనందం వ్యక్తం చేస్తున్నారు.

మొత్తం 1300 మీటర్ల పొడవుతో రూ.70 లక్షల వ్యయంతో ఈ రహదారి నిర్మాణం చేపట్టారు. ఇందులో భాగంగా తూర్పు బజార్ రోడ్ వరకు 650 మీటర్ల పొడవు, సుమారు 3.7 మీటర్ల వెడల్పుతో రూ.35 లక్షల వ్యయంతో పనులు జరుగుతున్నాయి.

గతంలో ఈ రహదారి బురదమయం, గుంతలతో ఉండడంతో గ్రామస్తులు తీవ్ర ఇబ్బందులు పడేవారు. ముఖ్యంగా వర్షాకాలంలో రాకపోకలు దాదాపు అసాధ్యంగా మారి విద్యార్థులు, వృద్ధులు, రైతులు తీవ్ర కష్టాలు ఎదుర్కొనేవారు.

ఈ సమస్యను గుర్తించిన టీడీపీ నాయకుడు మంచిన పూర్ణ చంద్రరావు, మంత్రి కొలుసు పార్థసారథి దృష్టికి తీసుకెళ్లగా, వెంటనే స్పందించిన మంత్రి నిధులు మంజూరు చేయించారు. ప్రస్తుతం ఆ నిధులతో పనులు శరవేగంగా కొనసాగుతున్నాయి.

పనులు పూర్తయిన తర్వాత గ్రామంలో రవాణా సౌకర్యం గణనీయంగా మెరుగుపడి, ప్రజల దైనందిన జీవితం సులభతరం కానుంది. ఈ సందర్భంగా గ్రామ ప్రజల తరఫున మోరంపూడి జయరాం కృతజ్ఞతలు తెలిపారు.

ఇంకా గ్రామంలో ఒక బ్రిడ్జ్ నిర్మాణం మిగిలి ఉందని, అది కూడా పూర్తయితే కోటపాడు గ్రామంలో రవాణా సమస్యలు పూర్తిగా తొలగిపోతాయని గ్రామ ప్రజలు ఆశాభావం వ్యక్తం చేస్తున్నారు.