కర్ణాటక సంగీతానికి కొత్త ఊపిరి ఇచ్చిన మంగళంపల్లి బాలమురళీకృష్ణ జయంతి

ఈరోజు కర్ణాటక సంగీత దిగ్గజం, గానగంధర్వుడు, బహుముఖ ప్రజ్ఞాశాలి  జయంతి.

1910 తర్వాత కర్ణాటక సంగీతం క్రమంగా జనాదరణకు దూరమవుతున్న సమయంలో మహారాజపురం విశ్వనాథ అయ్యర్, జి.ఎన్. బాలసుబ్రహ్మణ్యం, అరియక్కుడి రామానుజ అయ్యంగార్, సెమ్మంగుడి శ్రీనివాస అయ్యర్ వంటి మహానుభావులు తమ గానప్రతిభతో దానికి మళ్లీ వైభవాన్ని తీసుకొచ్చారు. ఆ తర్వాతి తరంలో కర్ణాటక సంగీతానికి కొత్త శక్తిని, కొత్త దిశను అందించిన మహామేధావి బాలమురళీకృష్ణ.

ఆయన సంగీతం సంప్రదాయానికి కొత్త అర్థాన్ని చెప్పింది. ఒక దశలో "బాలమురళి పాడేది సంగీతమే కాదు" అంటూ కోర్టు వరకు వివాదం వెళ్లింది. కానీ ఆ పోరాటంలో ఆయన విజయం సాధించారు. అది వ్యక్తిగత విజయం మాత్రమే కాదు, సంగీతంలో సృజనాత్మకతకు లభించిన గౌరవం కూడా.

బాలమురళీకృష్ణ వేదికపైకి వస్తే సంగీత సరస్వతి ఆయనలో అవతరించినట్లు అనిపించేది. ఇతర శాస్త్రీయ సంగీత విద్వాంసుల మాదిరిగా కఠిన సాధనల ప్రదర్శన కంటే, ఆయనకు సంగీతం సహజసిద్ధంగా ప్రవహించేది. ఆయన గానం వినేవారికి అది కేవలం సంగీత కచేరి కాదు, ఒక ఆధ్యాత్మిక అనుభూతి.

కర్ణాటక సంగీతంలో ఆయన చేసిన ప్రయోగాలు విశేషమైనవి. కొత్త రాగాలు సృష్టించారు. సాహిత్యాన్ని దెబ్బతీయకుండా, భావాన్ని కోల్పోకుండా, సులభంగా ప్రజల హృదయాలకు చేరేలా పాడగలిగిన అరుదైన గాయకుడు ఆయన. తొలినాళ్లలో జి.ఎన్. బాలసుబ్రహ్మణ్యం గానాన్ని ఆదర్శంగా తీసుకున్న బాలమురళి, తరువాతి కాలంలో తానే ఒక ఆదర్శంగా నిలిచారు.

వారి మేధస్సు కర్ణాటక సంగీతాన్ని ప్రపంచవ్యాప్తంగా విస్తరించింది. విజయవాడ నుంచి మద్రాసుకు వెళ్లడం ఆయన సంగీత జీవితానికి కొత్త అవకాశాలను తెరిచింది. అక్కడ ఆయన ప్రతిభ మరింత వికసించింది.

బాలమురళీకృష్ణ కేవలం గొప్ప సంగీత విద్వాంసుడు మాత్రమే కాదు, మంచి కవి కూడా. తెలుగు, తమిళం, సంస్కృత భాషల్లో ఎన్నో కీర్తనలు, వర్ణాలు, కృతులు, తిల్లానాలు రచించారు. ఆయన రచనలు "సూర్యకాంతి" పేరుతో పుస్తక రూపంలో వెలువడ్డాయి. ఆ రచనలు ఆయన సాహిత్య, సంగీత ప్రతిభకు నిదర్శనంగా నిలిచాయి.

మేధస్సు, సంగీతం, సృజనాత్మకత – ఈ మూడు కలిసిన అరుదైన వ్యక్తిత్వం మంగళంపల్లి బాలమురళీకృష్ణ. కర్ణాటక సంగీత చరిత్రలో ఆయన ఒక అధ్యాయం కాదు, ఒక యుగం.