TGREDCO డీఈ ముత్యం వెంకటరమణ నివాసంలో ఏసీబీ సోదాలు
TGREDCO డీఈ ముత్యం వెంకటరమణ నివాసంలో ఏసీబీ సోదాలు
హైదరాబాద్‌లోని మాదాపూర్‌లో ఉన్న టీజీఆర్‌ఈడీసీఓ (TGREDCO) డీఈ ముత్యం వెంకటరమణ నివాసంలో అవినీతి నిరోధక శాఖ (ఏసీబీ) అధికారులు బుధవారం విస్తృత సోదాలు నిర్వహించారు. మాదాపూర్ నివాసంతో పాటు రాష్ట్రంలోని మరో 15 ప్రాంతాల్లో ఏకకాలంలో తనిఖీలు చేపట్టారు.
అధికారిక సమాచారం ప్రకారం, ముత్యం వెంకటరమణ ఆదాయానికి మించి ఆస్తులు కూడబెట్టినట్లు వచ్చిన ఆరోపణల ఆధారంగా ఈ దాడులు నిర్వహించారు. సోదాల్లో నగదు, బంగారం, స్థిరాస్తులకు సంబంధించిన పత్రాలు, బ్యాంకు లాకర్లు, పెట్టుబడుల వివరాలను అధికారులు పరిశీలిస్తున్నారు. స్వాధీనం చేసుకున్న పత్రాల విలువ, అక్రమాస్తుల వివరాలను లెక్కించే ప్రక్రియ కొనసాగుతోంది.
కాగా, ముత్యం వెంకటరమణ గతంలో 2019లో టీఎస్‌ఎస్‌పీడీసీఎల్‌లో డీఈగా పనిచేస్తున్న సమయంలో లంచం తీసుకుంటూ ఏసీబీ అధికారులకు పట్టుబడ్డారు. ఆ సమయంలో కూడా ఆయన నివాసంలో సోదాలు నిర్వహించిన అధికారులు భారీ మొత్తంలో అక్రమాస్తులను గుర్తించిన విషయం తెలిసిందే.
ప్రస్తుతం కొనసాగుతున్న సోదాలకు సంబంధించిన పూర్తి వివరాలు, స్వాధీనం చేసిన ఆస్తుల విలువపై ఏసీబీ అధికారిక ప్రకటన వెలువడాల్సి ఉంది.
