తల్లిదండ్రులకు రక్షణగా “పేరెంట్స్ సపోర్ట్ బిల్లు”

తల్లిదండ్రులకు రక్షణగా “పేరెంట్స్ సపోర్ట్ బిల్లు”  తెలంగాణ కేబినెట్ కీలక నిర్ణయం

హైదరాబాద్, మార్చి 23: వృద్ధ తల్లిదండ్రుల సంక్షేమాన్ని దృష్టిలో ఉంచుకుని తెలంగాణ ప్రభుత్వం కీలక నిర్ణయం తీసుకుంది. “పేరెంట్స్ సపోర్ట్ బిల్లు”కు రాష్ట్ర కేబినెట్ ఆమోదం తెలిపింది. కుటుంబ బాధ్యతలను నిర్లక్ష్యం చేస్తున్న వారిపై కఠిన చర్యలు తీసుకునేలా ఈ బిల్లు రూపుదిద్దుకుంది.

ఈ బిల్లు ప్రకారం తల్లిదండ్రులను చూసుకోని ప్రజా ప్రతినిధులు, ప్రభుత్వ మరియు ప్రైవేట్ ఉద్యోగుల జీతాల నుంచి 15 శాతం లేదా రూ.10,000 (ఏది తక్కువైతే అది) కోత విధించి, ఆ మొత్తాన్ని వారి తల్లిదండ్రులకు అందించే విధానం అమలు చేయనున్నారు.

ఫిర్యాదుల ఆధారంగా సంబంధిత అధికారుల ద్వారా విచారణ జరిపి, నిర్లక్ష్యం నిర్ధారణ అయిన పక్షంలోనే ఈ కోత అమలు అవుతుందని ప్రభుత్వం స్పష్టం చేసింది. వృద్ధుల ఆర్థిక భద్రతను బలోపేతం చేయడంతో పాటు కుటుంబ విలువలను కాపాడటం ఈ చట్టం ప్రధాన ఉద్దేశ్యంగా పేర్కొంది.

ఈ నిర్ణయంతో వృద్ధ తల్లిదండ్రులకు మరింత రక్షణ లభిస్తుందని, కుటుంబ బాధ్యతలపై సమాజంలో చైతన్యం పెరుగుతుందని ప్రభుత్వం భావిస్తోంది.