ఉద్యమ కళాకారుల సేవలు తెలంగాణ చరిత్రలో చిరస్మరణీయం: ఎంపీ గడ్డం వంశీకృష్ణ

మంచిర్యాల, జూన్ 14: తెలంగాణ రాష్ట్ర సాధనలో ఉద్యమ కళాకారులు పోషించిన పాత్ర ఎంతో గొప్పదని, వారి ఆటపాటలు, త్యాగాలు రాష్ట్ర చరిత్రలో చిరస్మరణీయంగా నిలిచిపోతాయని పెద్దపల్లి ఎంపీ గడ్డం వంశీకృష్ణ అన్నారు. ఆదివారం మంచిర్యాల జిల్లా కలెక్టరేట్ ఆడిటోరియంలో తెలంగాణ ఆవిర్భావ దినోత్సవం సందర్భంగా నిర్వహించిన ఉద్యమ కళాకారుల సన్మాన సభకు ఆయన ముఖ్య అతిథిగా హాజరయ్యారు. ఈ సందర్భంగా ఆయన పలువురు ఉద్యమ కళాకారులను శాలువాలతో ఘనంగా సన్మానించి అభినందనలు తెలిపారు.

​అనంతరం ఎంపీ వంశీకృష్ణ మాట్లాడుతూ.. తెలంగాణ ఉద్యమ స్ఫూర్తిని పల్లెపల్లెకూ తీసుకెళ్లి ప్రజల్లో అపారమైన చైతన్యం నింపడంలో కళాకారుల కృషి విశేషమైనదని కొనియాడారు. రాష్ట్ర ప్రభుత్వం సైతం వారి సంక్షేమానికి ప్రత్యేక ప్రాధాన్యత ఇస్తోందని, తెలంగాణ సాధన కోసం పోరాడిన ప్రతి ఒక్కరి సేవలను స్మరించుకోవడం మనందరి బాధ్యత అని ఆయన స్పష్టం చేశారు. ఈ కార్యక్రమంలో జిల్లా అదనపు కలెక్టర్, వివిధ ప్రభుత్వ శాఖల అధికారులు, ప్రజాప్రతినిధులు, కాంగ్రెస్ పార్టీ నాయకులు మరియు కార్యకర్తలు పాల్గొన్నారు