వైద్యారోగ్య శాఖలో ఉద్యోగాల జాతర..

వైద్యారోగ్య శాఖలో ఉద్యోగాల జాతర.. రెండేళ్లలో 10 వేల పోస్టుల భర్తీ! శాసనమండలిలో మంత్రి దామోదర్ రాజనర్సింహ వెల్లడి.

హైదరాబాద్: ప్రభుత్వ ఆసుపత్రుల్లో పేదలకు మెరుగైన వైద్య సేవలు అందించడమే లక్ష్యంగా తమ ప్రభుత్వం పనిచేస్తోందని రాష్ట్ర ఆరోగ్యశాఖ మంత్రి దామోదర్ రాజనర్సింహ స్పష్టం చేశారు. ఆదివారం శాసనమండలిలో సభ్యులు అడిగిన పలు ప్రశ్నలకు మంత్రి సుదీర్ఘంగా సమాధానమిచ్చారు.

​రికార్డు స్థాయిలో నియామకాలు:

గత రెండు సంవత్సరాలలో సుమారు 10 వేల పోస్టులను భర్తీ చేశామని, మరో 7 వేలకు పైగా పోస్టుల రిక్రూట్‌మెంట్ ప్రక్రియ చివరి దశలో ఉందని మంత్రి వెల్లడించారు. వీటిలో ప్రధానంగా:

​టీచింగ్ పోస్టులు: మెడికల్ కాలేజీల్లో 1200 పోస్టులను కాంట్రాక్ట్ పద్ధతిలో భర్తీ చేయగా, 607 అసిస్టెంట్ ప్రొఫెసర్ పోస్టుల భర్తీ ఏప్రిల్‌లో పూర్తి కానుంది.

​నర్సింగ్ ఆఫీసర్లు: ఇప్పటికే 7 వేల పోస్టులు భర్తీ అయ్యాయి, మరో 2312 పోస్టుల ప్రక్రియ ఏప్రిల్‌లో ముగియనుంది.

​స్పెషలిస్ట్ డాక్టర్లు: తెలంగాణ వైద్య విధాన పరిషత్ పరిధిలో 1616 పోస్టుల భర్తీ మరో నెల రోజుల్లో పూర్తి కానుంది.

​ల్యాబ్ టెక్నీషియన్లు: గత రెండేళ్లలో 1500లకు పైగా పోస్టులను భర్తీ చేశామని వివరించారు.

​కొరతకు కారణాలివే:

రాష్ట్రంలో ఒక్కసారిగా మెడికల్ కాలేజీల సంఖ్య పెరగడంతో డాక్టర్ల కొరత ఏర్పడిందని మంత్రి తెలిపారు. ముఖ్యంగా నేషనల్ మెడికల్ కమిషన్ (NMC) నిబంధనల ప్రకారం అర్హులైన అసోసియేట్ ప్రొఫెసర్, ప్రొఫెసర్ పోస్టులకు తగిన సంఖ్యలో అభ్యర్థులు అందుబాటులో లేకపోవడం వల్ల భర్తీలో ఇబ్బందులు ఎదురవుతున్నాయని పేర్కొన్నారు.

​ప్రైవేటు మెడికల్ షాపుల తొలగింపు:

ప్రభుత్వ ఆసుపత్రుల్లో ప్రైవేటు మెడికల్ షాపుల నిర్వహణపై సభ్యులు అడిగిన ప్రశ్నకు స్పందిస్తూ.. తమ ప్రభుత్వం వచ్చాక కొత్తగా ఎవరికీ అనుమతులు ఇవ్వలేదని మంత్రి స్పష్టం చేశారు. గతంలో ఉన్న షాపులను కూడా తొలగించేందుకు ప్రయత్నిస్తున్నామని, అయితే కొన్ని షాపులు కోర్టు నుంచి స్టే ఆర్డర్లు తెచ్చుకున్నాయని తెలిపారు. కోర్టు అనుమతి రాగానే వాటిని కూడా తొలగించి, ప్రజలకు తక్కువ ధరకే మందులు అందించేలా జనరిక్ మెడికల్ షాపులను ప్రోత్సహిస్తామని మంత్రి వివరించారు.