వివాహేతర సంబంధం.. భర్త హత్య కేసులో భార్య, ప్రియుడు అరెస్ట్‌
కర్ణాటకలోని మైసూరు జిల్లా హున్సూర్‌లో ఘటన
భర్త నిద్రలోనే చనిపోయాడని కుటుంబ సభ్యులను నమ్మించిన భార్య
అనుమానంతో ఫిర్యాదు చేసిన మృతుడి కుటుంబ సభ్యులు
హున్సూర్‌, కర్ణాటక | ఎన్ టుడే న్యూస్‌:
కర్ణాటకలోని మైసూరు జిల్లా హున్సూర్‌లో భర్త హత్య కేసు వెలుగులోకి వచ్చింది. వివాహేతర సంబంధం నేపథ్యంలో భర్తను హత్య చేసినట్లు ఆరోపణలు ఎదుర్కొంటున్న భార్య పవిత్ర (30), ఆమె ప్రియుడు సునీల్‌ (30)ను పోలీసులు అరెస్ట్‌ చేసి రిమాండ్‌కు తరలించినట్లు సమాచారం.
పోలీసుల విచారణ వివరాల ప్రకారం.. రామ ప్రసాద్‌ (35), పవిత్ర దంపతులకు 11 ఏళ్ల కుమారుడు, 9 ఏళ్ల కుమార్తె ఉన్నారు. పవిత్రకు సునీల్‌తో వివాహేతర సంబంధం ఉన్నట్లు, అతడితో కలిసి జీవించేందుకు భర్తను హత్య చేయాలని ఇద్దరూ పథకం వేసినట్లు ఆరోపణలు ఉన్నాయి.
దాతుర విత్తనాలు విషపూరితమైనవని తెలుసుకున్న పవిత్ర వాటిని ఇడ్లీలో కలిపినట్లు పోలీసుల దర్యాప్తులో వెల్లడైనట్లు సమాచారం. అక్టోబర్‌ 16న పని ముగించుకుని ఇంటికి వచ్చిన రామ ప్రసాద్‌కు ఆమె విషపూరిత పదార్థం కలిపిన ఇడ్లీలు ఇచ్చినట్లు ఆరోపణలు ఉన్నాయి. అవి తిన్న వెంటనే అతడిపై ప్రభావం కనిపించకపోవడంతో సునీల్‌ను ఇంటికి పిలిచినట్లు తెలుస్తోంది.
ఆ తర్వాత ఇద్దరూ కలిసి రామ ప్రసాద్‌ గొంతు నులిమి హత్య చేసినట్లు పోలీసులు నిర్ధారించినట్లు సమాచారం.
రామ ప్రసాద్‌ పెరుగన్నం తిన్న తర్వాత నిద్రపోయాడని, నిద్రలోనే మరణించాడని పవిత్ర కుటుంబ సభ్యులకు చెప్పినట్లు తెలుస్తోంది. ఆమె మాటలను నమ్మిన కుటుంబ సభ్యులు అంత్యక్రియలు నిర్వహించారు.
అయితే, రామ ప్రసాద్‌ మరణించిన రాత్రి సునీల్‌ ఇంటి నుంచి బయటకు వెళ్లినట్లు స్థానికులు చెప్పడంతో కుటుంబ సభ్యులకు అనుమానం వచ్చింది. దీంతో వారు పోలీసులకు ఫిర్యాదు చేశారు. కేసు నమోదు చేసి దర్యాప్తు చేపట్టిన పోలీసులు, రామ ప్రసాద్‌ హత్యలో పవిత్ర, సునీల్‌ ప్రమేయం ఉన్నట్లు గుర్తించి ఇద్దరినీ అరెస్ట్‌ చేసినట్లు సమాచారం.
