చదువులో గుజరాత్ వెనుకంజ.. ఎస్డీజీ నివేదికలో ఆందోళనకర గణాంకాలు

చదువులో గుజరాత్ వెనుకంజ.. ఎస్డీజీ నివేదికలో ఆందోళనకర గణాంకాలు

అహ్మదాబాద్, జూలై 27: దేశానికే గుజరాత్‌ను "మోడల్ రాష్ట్రం"గా ప్రచారం చేస్తున్నప్పటికీ, విద్యారంగంలో ఆ రాష్ట్రం జాతీయ సగటు కంటే వెనుకబడి ఉందని కేంద్ర ప్రభుత్వ సుస్థిర అభివృద్ధి లక్ష్యాల (ఎస్‌డీజీ) పురోగతి నివేదిక వెల్లడించింది. పాఠశాల విద్య, ఉన్నత విద్యలో నమోదు, విద్యార్థుల అభ్యసన ఫలితాలు వంటి కీలక సూచికల్లో గుజరాత్ పనితీరు నిరాశాజనకంగా ఉందని నివేదిక పేర్కొంది.

ఇంటర్ పూర్తి చేస్తున్నది సగం మందే 2024–25 ఎస్‌డీజీ నివేదిక ప్రకారం గుజరాత్‌లో కేవలం 50.82 శాతం మంది విద్యార్థులు మాత్రమే 12వ తరగతి పూర్తి చేస్తున్నారు. జాతీయ సగటు 61.14 శాతం కాగా, రాష్ట్రంలో 49.18 శాతం మంది విద్యార్థులు ఇంటర్ పూర్తి చేయకముందే చదువు మానేస్తున్నట్లు వెల్లడైంది.

కళాశాలల్లో నమోదు తక్కువ 2022–23 తాత్కాలిక గణాంకాల ప్రకారం గుజరాత్‌లో ఉన్నత విద్య స్థూల నమోదు నిష్పత్తి (జీఈఆర్) 26.2 శాతం మాత్రమే. జాతీయ సగటు 29.5 శాతంతో పోలిస్తే ఇది తక్కువ. ఈ పనితీరుతో గుజరాత్ దేశంలోని రాష్ట్రాలు, కేంద్రపాలిత ప్రాంతాల్లో 23వ స్థానంలో నిలిచింది.

ప్రాథమిక స్థాయిలోనూ వెనుకబాటు ప్రాథమిక స్థాయిలో నికర నమోదు నిష్పత్తి 77.9 శాతం, ఉన్నత ప్రాథమిక స్థాయిలో 67.5 శాతం మాత్రమే ఉంది. అంటే ప్రారంభ దశలోనే గణనీయమైన సంఖ్యలో విద్యార్థులు విద్యా వ్యవస్థకు దూరమవుతున్నారని నివేదిక సూచిస్తోంది.

తరగతి గది అభ్యసనలోనూ నిరాశాజనక ఫలితాలు పరాఖ్ జాతీయ సర్వే ప్రకారం 3, 6, 9వ తరగతులలో భాష, గణిత అంశాల్లో గుజరాత్ విద్యార్థుల ప్రావీణ్యం జాతీయ సగటు కంటే తక్కువగా నమోదైంది.

3వ తరగతి: భాష – 46% (జాతీయ సగటు 61%), గణితం – 38% (జాతీయ సగటు 54%)

6వ తరగతి: భాష – 22% (జాతీయ సగటు 33%), గణితం – 23% (జాతీయ సగటు 38%)

9వ తరగతి: భాష – 24% (జాతీయ సగటు 31%), గణితం – 3% (జాతీయ సగటు 11%)

ఉన్నత మాధ్యమిక విద్యలోనూ తక్కువ నమోదు 2024–25లో ఉన్నత మాధ్యమిక విద్య స్థూల నమోదు నిష్పత్తి గుజరాత్‌లో 47.3 శాతం మాత్రమే ఉండగా, జాతీయ సగటు 58.4 శాతంగా ఉంది. అర్హత ఉన్న విద్యార్థుల్లో సగానికి పైగా ఉన్నత మాధ్యమిక విద్యలో చేరడం లేదని నివేదిక తెలిపింది.

నిర్మాణాత్మక సంస్కరణలు అవసరం రాష్ట్ర విద్యా రంగానికి నిర్మాణాత్మక సంస్కరణలు అవసరమని గుజరాత్ కాంగ్రెస్ అధికార ప్రతినిధి పార్థివ్‌రాజ్ కత్వాడియా పేర్కొన్నారు. విద్యలో ప్రయివేటీకరణ, వాణిజ్యీకరణను తగ్గించి, నాణ్యమైన విద్యా వ్యవస్థను నిర్మించేందుకు విద్యా నిపుణుల భాగస్వామ్యాన్ని పెంచాలని సూచించారు.