కడప జిల్లాలో మంత్రి నారా లోకేష్ ఆకస్మిక పాఠశాల తనిఖీ

దొరసానిపల్లి జెడ్పీ ఉన్నత పాఠశాలలో విద్యార్థులతో ముచ్చట.. అభ్యసన ఫలితాలపై ఆరా.. హాజరు, డ్రాప్‌అవుట్స్‌పై ప్రత్యేక దృష్టి పెట్టాలని ఆదేశం

ప్రొద్దుటూరు, జూలై 15: విద్య, ఐటీ శాఖల మంత్రి నారా లోకేష్ కడప జిల్లా పర్యటనలో భాగంగా ప్రొద్దుటూరు మండలం దొరసానిపల్లి జెడ్పీ ఉన్నత పాఠశాలను బుధవారం ఆకస్మికంగా సందర్శించారు. పాఠశాలలో మౌలిక వసతులు, విద్యార్థుల అభ్యసన ఫలితాలు, ఉపాధ్యాయుల పనితీరు, హాజరు వివరాలను పరిశీలిస్తూ అధికారులతో సమీక్ష నిర్వహించారు. విద్యార్థులతో నేరుగా మాట్లాడి వారి చదువు, పాఠశాల పరిస్థితులు, ప్రభుత్వ సంక్షేమ కార్యక్రమాల అమలుపై అభిప్రాయాలు తెలుసుకున్నారు.

మంత్రి ముందుగా పదో తరగతి విద్యార్థులతో ప్రత్యేకంగా సమావేశమై సర్వేపల్లి రాధాకృష్ణ విద్యార్థి మిత్ర కిట్లు అందాయా, వాటి నాణ్యత ఎలా ఉందని అడిగి తెలుసుకున్నారు. విద్యార్థులు కిట్లు ఉపయోగకరంగా ఉన్నాయని తెలిపారు. అనంతరం ఇరాన్–అమెరికా మధ్య నెలకొన్న ఉద్రిక్తతల గురించి ఎంతమంది విద్యార్థులు తెలుసుకున్నారో ప్రశ్నించి, సమకాలీన అంశాలపై కూడా అవగాహన పెంచుకోవాలని సూచించారు. చదువుతో పాటు ప్రతిరోజూ శారీరక వ్యాయామం చేయడం ఆరోగ్యానికి ఎంత ముఖ్యమో వివరించారు.

ఈ సందర్భంగా విద్యార్థులను ఉద్దేశించి మంత్రి మాట్లాడుతూ, "మీకు మంచి మార్కులు వస్తేనే నాకు కూడా మంచి మార్కులు వచ్చినట్టే. నా భవిష్యత్తు మీ విజయంపైనే ఆధారపడి ఉంది" అని వ్యాఖ్యానించారు. ప్రభుత్వ పాఠశాలలను బలోపేతం చేయడమే ప్రభుత్వ ప్రధాన లక్ష్యమని, అందుకోసం అవసరమైన మౌలిక సదుపాయాలు, పాఠ్యపుస్తకాలు, యూనిఫాంలు, షూస్, 'తల్లికి వందనం' వంటి సంక్షేమ పథకాలను అమలు చేస్తున్నట్లు తెలిపారు.

మధ్యాహ్న భోజనం నాణ్యతపై విద్యార్థులను ప్రశ్నించిన మంత్రి, భోజనం బాగుందని విద్యార్థులు చెప్పడంతో సంతృప్తి వ్యక్తం చేశారు. ఐవీఆర్ఎస్ ద్వారా తల్లిదండ్రులు ఎందుకు ఫీడ్‌బ్యాక్ ఇవ్వడం లేదని అధికారులను ప్రశ్నించి, తల్లిదండ్రుల భాగస్వామ్యాన్ని పెంచేందుకు చర్యలు తీసుకోవాలని సూచించారు.

పాఠశాల లెర్నింగ్ అవుట్‌కమ్స్‌లో కేవలం 1.3 స్టార్ రేటింగ్ మాత్రమే ఉండటంపై ప్రిన్సిపాల్ ఏ. ధనలక్ష్మిని మంత్రి ప్రశ్నించారు. ఫార్మేటివ్, సమ్మేటివ్ అసెస్‌మెంట్లపై తల్లిదండ్రులకు అవగాహన కల్పించాలని, విద్యార్థుల అభ్యసన ఫలితాల మెరుగుదలపై ప్రత్యేక దృష్టి పెట్టాలని ఆదేశించారు. వెనుకబడిన పాఠశాలలను మండల విద్యాధికారులు ప్రతి 15 రోజులకు ఒకసారి సమీక్షించాలని స్పష్టం చేశారు.

విద్యార్థులు, ఉపాధ్యాయుల హాజరు తక్కువగా ఉండటంపై కూడా మంత్రి ఆరా తీశారు. హాజరు శాతాన్ని పెంచేందుకు ప్రత్యేక కార్యాచరణ ప్రణాళిక రూపొందించాలని, అనుమతి లేకుండా ఉపాధ్యాయులు గైర్హాజరయ్యే పరిస్థితి రాకుండా పర్యవేక్షణ కట్టుదిట్టం చేయాలని అధికారులను ఆదేశించారు.

పాఠశాలలో గత ఏడాదితో పోలిస్తే విద్యార్థుల నమోదు తగ్గడంపై ప్రశ్నించగా, 10 మంది విద్యార్థులు వసతిగృహాలు, కేజీబీవీలకు వెళ్లడంతో నమోదు తగ్గిందని ప్రిన్సిపాల్ వివరించారు. అయితే గత ఏడాదికంటే విద్యా ఫలితాలు మెరుగుపడినందుకు మంత్రి అభినందించారు.

ప్రభుత్వ పాఠశాలలను రాష్ట్రంలో ఆదర్శంగా తీర్చిదిద్దడమే లక్ష్యమని, అందుకు ఉపాధ్యాయుల పూర్తి సహకారం అవసరమని మంత్రి పేర్కొన్నారు. ఏపీ మోడల్ ఆఫ్ ఎడ్యుకేషన్ను విజయవంతం చేయాలంటే అందరూ సమిష్టిగా పనిచేయాలని పిలుపునిచ్చారు. విద్యార్థుల డ్రాప్‌అవుట్స్‌పై ప్రత్యేక దృష్టి పెట్టాలని, ముఖ్యంగా బాలికలు చదువు మధ్యలో మానేయకుండా ప్రతి విద్యార్థిని నిరంతరం ట్రాక్ చేయాలని సూచించారు.

చివరగా వచ్చే విద్యా సంవత్సరానికి లెర్నింగ్ అవుట్‌కమ్స్‌లో పాఠశాల 4 స్టార్ రేటింగ్ సాధించేలా కృషి చేస్తామని ప్రిన్సిపాల్ హామీ ఇవ్వగా, మంత్రి సంతోషం వ్యక్తం చేశారు. అనంతరం విద్యార్థులు, ఉపాధ్యాయులతో కలిసి మంత్రి ఫోటోలు దిగారు.