మైలవరం పాఠశాలలో మంత్రి లోకేష్ ఆకస్మిక తనిఖీ

మధ్యాహ్న భోజనం రుచి చూసి పరిశీలన – నిర్లక్ష్యం సహించబోమని హెచ్చరిక

మైలవరం, మార్చి 17: ఎన్టీఆర్ జిల్లా మైలవరం మండలం దేవునిచెరువు తారకరామా నగర్ ఎంపీపీ ప్రాథమిక పాఠశాలను విద్య, ఐటీ శాఖల మంత్రి Nara Lokesh మంగళవారం ఆకస్మికంగా తనిఖీ చేశారు. ఇటీవల మధ్యాహ్న భోజనం నాణ్యతపై వచ్చిన ఫిర్యాదుల నేపథ్యంలో ఈ తనిఖీ చేపట్టారు.

పాఠశాలలో విద్యార్థులకు వడ్డిస్తున్న భోజనాన్ని స్వయంగా రుచి చూసి నాణ్యతను పరిశీలించిన మంత్రి, విద్యార్థులతో మాట్లాడి వివరాలు తెలుసుకున్నారు. ప్రస్తుతం భోజనం బాగుందని విద్యార్థులు తెలిపారు. గతంలో జరిగిన ఘటనపై కూడా మంత్రి ఆరా తీశారు.

భోజనం సరిగా లేకపోతే వెంటనే తల్లిదండ్రులకు తెలియజేయాలని విద్యార్థులకు సూచించారు. ‘లీప్ యాప్’ ద్వారా తల్లిదండ్రుల అభిప్రాయాలు సేకరించనున్నట్లు తెలిపారు.

కఠిన చర్యలు తప్పవు:

సిబ్బందితో మాట్లాడుతూ చిన్న నిర్లక్ష్యానికైనా కఠిన చర్యలు తప్పవని మంత్రి హెచ్చరించారు. ప్రతిరోజూ ఒక ఉపాధ్యాయుడు భోజనం నాణ్యతను తనిఖీ చేయాలని ఆదేశించారు.

విద్యా ప్రమాణాలపై దృష్టి:

పాఠశాలలో బోధన విధానం, పరిశుభ్రత, రికార్డులను పరిశీలించిన మంత్రి, విద్యార్థుల అభ్యసన సామర్థ్యాల పెంపుపై దృష్టి పెట్టాలని సూచించారు. అనంతరం అంగన్‌వాడీ కేంద్రాన్ని సందర్శించి సంతృప్తి వ్యక్తం చేశారు.

ప్రభుత్వ పాఠశాలల్లో మధ్యాహ్న భోజనం నాణ్యతపై ఎలాంటి రాజీ ఉండదని మంత్రి స్పష్టం చేశారు.