నరసాపురం: జనసేన ఎమ్మెల్యే పనితీరుపై సీఎం చంద్రబాబు అసంతృప్తి

పశ్చిమ గోదావరి జిల్లా నరసాపురం నియోజకవర్గంలో సమీక్ష సందర్భంగా జనసేన ఎమ్మెల్యే బొమ్మిడి నాయకర్ పనితీరుపై ముఖ్యమంత్రి చంద్రబాబు నాయుడు అసంతృప్తి వ్యక్తం చేశారు.

వేదికపైనే ఎమ్మెల్యే పనితీరును ప్రస్తావించిన చంద్రబాబు.. “మీరు, మీ నియోజకవర్గ అధికారులు సరిగ్గా పని చేయడం లేదు. జిల్లా పరిస్థితి బాగుంది కానీ, నరసాపురం నియోజకవర్గం మాత్రం ఆశించిన స్థాయిలో లేదు” అని వ్యాఖ్యానించినట్లు సమాచారం.

నియోజకవర్గ పనితీరుపై వచ్చిన నివేదికలను ప్రస్తావిస్తూ.. 25 అంశాల్లో అనుకూల పరిస్థితులు ఉంటే, 23 అంశాల్లో ప్రతికూలతలు ఉన్నాయని, ఇది ఆమోదయోగ్యం కాదని సీఎం అసంతృప్తి వ్యక్తం చేసినట్లు తెలుస్తోంది.

ప్రభుత్వ పథకాల అమలు, అభివృద్ధి పనులు, ప్రజా సమస్యల పరిష్కారంలో వేగం పెంచాలని.. ప్రజాప్రతినిధులు, అధికారులు సమన్వయంతో పనిచేయాలని చంద్రబాబు సూచించినట్లు సమాచారం.