ఫుడ్ ఇన్స్పెక్టర్ పేరుతో మోసం.. డబ్బులు డిమాండ్ చేస్తూ పట్టుబడ్డ వ్యక్తి
అనంతపురం: నగరంలో నకిలీ ఫుడ్ ఇన్స్పెక్టర్గా నటిస్తూ ఓ వ్యక్తి హల్చల్ చేసిన ఘటన కలకలం రేపింది. ఎస్పీ కార్యాలయానికి సమీపంలో, డీఎస్పీ కార్యాలయం పక్కన ఉన్న ఓ కిరాణా దుకాణంలో ఈ ఘటన చోటుచేసుకుంది.
అనిల్ కుమార్ అనే వ్యక్తి తనను ఫుడ్ ఇన్స్పెక్టర్గా పరిచయం చేసుకుని, దుకాణంలో సిగరెట్లు విక్రయిస్తున్నారని పేర్కొంటూ దుకాణదారుడిపై దౌర్జన్యానికి పాల్పడ్డాడు. ఫైన్ చెల్లించాలంటూ డబ్బులు డిమాండ్ చేసినట్లు సమాచారం.
ఈ వ్యవహారంపై అనుమానం వచ్చిన డీఎస్పీ కార్యాలయ కానిస్టేబుల్ ఆరా తీయడంతో అసలు విషయం వెలుగులోకి వచ్చింది. విచారణలో అనిల్ కుమార్ ఈగల్ ఐ సెక్యూరిటీ సర్వీస్ ఏజెన్సీలో ఫీల్డ్ ఆఫీసర్గా పనిచేస్తున్నట్లు తేలింది.
ఘటన సమయంలో అతడు మద్యం మత్తులో ఉన్నట్లు తెలుస్తోంది. పోలీసులకు చిక్కిన అనంతరం తనను విడిచిపెట్టాలని, తనకు పిల్లలు ఉన్నారని వేడుకున్నట్లు సమాచారం.
చివరకు నిందితుడు అనిల్ కుమార్ను డీఎస్పీ కార్యాలయ సిబ్బంది పోలీసులకు అప్పగించారు. ఘటనపై పోలీసులు కేసు నమోదు చేసి దర్యాప్తు చేపట్టారు.
