సింగరేణికి కొత్త కళ.. 9 కొత్త గనుల ప్రారంభానికి కసరత్తు

సింగరేణికి కొత్త కళ.. 9 కొత్త గనుల ప్రారంభానికి కసరత్తు

గ్యాస్ ఫికేషన్‌కు కేంద్ర ప్రోత్సాహం.. సింగరేణికి కొత్త అవకాశాలు

కొత్త ప్రాజెక్టులతో ఉపాధి, ఆదాయ వృద్ధిపై ప్రభుత్వ దృష్టి

సింగరేణి సంస్థను మరింత బలోపేతం చేస్తూ రాష్ట్ర అవసరాలకు అనుగుణంగా విస్తృత ప్రణాళికలను ప్రభుత్వం అమలు చేస్తోంది. బొగ్గు నిల్వలు తగ్గిపోతూ మూతపడుతున్న గనుల స్థానంలో కొత్త గనులను ప్రారంభించేందుకు వేగంగా చర్యలు కొనసాగుతున్నాయి.

ముఖ్యమంత్రి రేవంత్ రెడ్డి, ఉప ముఖ్యమంత్రి మల్లు భట్టి విక్రమార్క ప్రత్యేక పర్యవేక్షణలో సింగరేణి సంస్థ 9 కొత్త గనుల ప్రారంభానికి కసరత్తు ప్రారంభించింది. ఈ ప్రాజెక్టుల ద్వారా బొగ్గు ఉత్పత్తి పెరగడంతో పాటు వేలాది మందికి ఉద్యోగ, ఉపాధి అవకాశాలు లభించే అవకాశం ఉందని అధికారులు భావిస్తున్నారు.

ఇక కేంద్ర ప్రభుత్వం ఇంధన దిగుమతులపై ఆధారాన్ని తగ్గించి దేశీయ వనరులను సద్వినియోగం చేసుకునే లక్ష్యంతో గ్యాస్ ఫికేషన్ ప్రక్రియకు ప్రాధాన్యం ఇస్తోంది. ఈ నేపథ్యంలో సింగరేణి సంస్థ కూడా బొగ్గు గ్యాస్ ఫికేషన్ ప్రాజెక్టుల అమలుకు సిద్ధమవుతోంది.

వాస్తవానికి దశాబ్దం క్రితమే సింగరేణి ఈ ప్రక్రియపై ప్రణాళికలు సిద్ధం చేసినప్పటికీ అవి ముందుకు సాగలేదు. ప్రస్తుతం రాష్ట్ర ప్రభుత్వం కొత్త గనుల అభివృద్ధితో పాటు గ్యాస్ ఫికేషన్ ప్రాజెక్టులపై ప్రత్యేక దృష్టి సారిస్తోంది.

రాష్ట్రంలో ఉన్న బొగ్గు నిల్వలను పూర్తిస్థాయిలో వినియోగించుకోవడం ద్వారా విద్యుత్, పారిశ్రామిక అవసరాలను తీర్చడమే కాకుండా స్థానిక యువతకు పెద్ద ఎత్తున ఉపాధి కల్పించాలనే లక్ష్యంతో ప్రభుత్వం ముందుకు సాగుతోంది. రానున్న రెండు నుంచి మూడు సంవత్సరాల్లో సింగరేణి సంస్థ మరింత బలోపేతం కావడంతో పాటు కొత్త అవకాశాలకు కేంద్రంగా మారే అవకాశాలు కనిపిస్తున్నాయి.