స్టాక్ మార్కెట్‌లో నేటి నుంచి కొత్త టైమింగ్స్.. ట్రేడర్లకు కీలక మార్పులు!
స్టాక్ మార్కెట్‌లో నేటి నుంచి కొత్త టైమింగ్స్.. ట్రేడర్లకు కీలక మార్పులు!
ముంబై, ఆగస్టు 3: స్టాక్ మార్కెట్‌లో ట్రేడింగ్ విధానంలో కీలక మార్పులు అమల్లోకి వచ్చాయి. మార్కెట్ నియంత్రణ సంస్థ సెబీ తీసుకొచ్చిన కొత్త నిబంధనలు నేటి (ఆగస్టు 3) నుంచి అమల్లోకి వచ్చాయి. ముఖ్యంగా ఫ్యూచర్స్ అండ్ ఆప్షన్స్ (F&O) స్టాక్స్‌లో ట్రేడింగ్, క్లోజింగ్ ప్రక్రియలో మార్పులు చోటుచేసుకున్నాయి.
ఇప్పటి వరకు F&O స్టాక్స్‌లో రెగ్యులర్ ట్రేడింగ్ మధ్యాహ్నం 3:15 గంటలకు ముగిసేది. ఇకపై అదే సమయంలో ప్రత్యేక క్లోజింగ్ ఆక్షన్ సెషన్ (CAS) ప్రారంభమై మధ్యాహ్నం 3:35 గంటల వరకు కొనసాగుతుంది. ఈ సెషన్‌లో కొనుగోలు, అమ్మకాల ఆధారంగా నిర్ణయించే ధరనే ఆ రోజు అధికారిక ముగింపు ధరగా పరిగణిస్తారు.
అదేవిధంగా F&O ట్రేడింగ్ సమయాన్ని మరో 10 నిమిషాలు పొడిగించి సాయంత్రం 3:40 గంటల వరకు కొనసాగించేలా మార్పులు చేశారు. దీంతో ట్రేడర్లకు చివరి దశలో లావాదేవీలు పూర్తి చేసుకునేందుకు అదనపు సమయం లభించనుంది.
అయితే నాన్-F&O ఈక్విటీ క్యాష్ స్టాక్స్‌కు ఎలాంటి మార్పులు లేవు. వాటి ట్రేడింగ్ యథావిధిగా మధ్యాహ్నం 3:30 గంటలకే ముగుస్తుంది.
మార్కెట్ ముగింపు ధర మరింత పారదర్శకంగా నిర్ణయించేందుకు, ధరల్లో చివరి నిమిషాల్లో వచ్చే హెచ్చుతగ్గులను తగ్గించేందుకు ఈ మార్పులు తీసుకొచ్చినట్లు మార్కెట్ వర్గాలు పేర్కొంటున్నాయి.
