SBIలో 1,500 ప్రొబేషనరీ ఆఫీసర్ ఉద్యోగాలు.. డిగ్రీ అర్హతతో దరఖాస్తులకు అవకాశం

బ్యాంకింగ్ రంగంలో ఉద్యోగం సాధించాలని లక్ష్యంగా పెట్టుకున్న అభ్యర్థులకు స్టేట్ బ్యాంక్ ఆఫ్ ఇండియా (SBI) శుభవార్త అందించింది. దేశవ్యాప్తంగా ఉన్న శాఖల్లో ప్రొబేషనరీ ఆఫీసర్ (PO) పోస్టుల భర్తీ కోసం నోటిఫికేషన్ విడుదల చేసింది. మొత్తం 1,500 పోస్టులను భర్తీ చేయనుండగా, ఇందులో 1,446 రెగ్యులర్ పోస్టులు, 54 బ్యాక్‌లాగ్ పోస్టులు ఉన్నాయి.

ఈ ఉద్యోగాలకు ఏదైనా గుర్తింపు పొందిన విశ్వవిద్యాలయం నుంచి డిగ్రీ పూర్తి చేసిన అభ్యర్థులు దరఖాస్తు చేసుకోవచ్చు. ప్రస్తుతం డిగ్రీ చివరి సంవత్సరం చదువుతున్న విద్యార్థులు కూడా నిబంధనలకు లోబడి దరఖాస్తు చేసుకునే అవకాశం కల్పించారు.

అభ్యర్థుల వయస్సు 2026 ఏప్రిల్ 1 నాటికి 21 నుంచి 30 సంవత్సరాల మధ్య ఉండాలి. ప్రభుత్వ నిబంధనల ప్రకారం ఓబీసీ అభ్యర్థులకు 3 సంవత్సరాలు, ఎస్సీ/ఎస్టీ అభ్యర్థులకు 5 సంవత్సరాలు, దివ్యాంగులకు 10 నుంచి 15 సంవత్సరాల వరకు వయోసడలింపు వర్తిస్తుంది.

ఎంపికైన అభ్యర్థులు ప్రొబేషనరీ ఆఫీసర్‌గా నియమితులై ఆకర్షణీయమైన వేతనంతో పాటు ఇతర అలవెన్సులు కూడా పొందుతారు. వార్షిక వేతన ప్యాకేజీ సుమారు రూ.21 లక్షల వరకు ఉండే అవకాశం ఉందని నోటిఫికేషన్‌లో పేర్కొన్నారు.

ఆసక్తి, అర్హత కలిగిన అభ్యర్థులు 2026 జూలై 8 వరకు ఆన్‌లైన్‌లో దరఖాస్తు చేసుకోవచ్చు. దరఖాస్తు చేసేముందు అధికారిక నోటిఫికేషన్‌ను పూర్తిగా పరిశీలించి, అర్హతలు, ఎంపిక విధానం, పరీక్ష వివరాలను తెలుసుకుని దరఖాస్తు చేయడం మంచిది.